सिडको कार्यालयांमध्ये मर्यादित प्रवेश सुरू

नवी मुंबई ः राज्य शासनाच्या मिशन बिगिन अगेन अंतर्गत टाळेबंदी काळातील निर्बंध टप्प्याटप्प्याने शिथिल करण्यात येत आहेत. त्याअंतर्गत सिडको भवन, रायगड भवन आणि सिडकोच्या नवी मुंबईतील इतर कार्यालयांमध्ये अभ्यागतांना मर्यादित स्वरूपात काही अटींवर आणि नियोजित वेळापत्रकानुसार प्रवेश देण्याचा निर्णय सिडको प्रशासनातर्फे घेण्यात आला आहे. सामाजिक अंतराचे भान राखून व आरोग्यविषयक आवश्यक ती खबरदारी घेऊनच अभ्यागतांना यापूर्वी सुरू असलेल्या ई-पास व कलर कोड यंत्रणेची अंमलबजावणी करत प्रवेश देण्यात येणार आहे.  

कोविड-19 साथीचा प्रादुर्भाव रोखण्याच्या उद्देशाने करण्यात आलेल्या टाळेबंदीच्या पार्श्‍वभूमीवर सिडकोच्या सिडको भवन, रायगड भवन व नवी मुंबईतील इतर कार्यालयांमध्ये अभ्यागतांना 23 मार्च 2020 पासून पूर्णत: प्रवेशबंदी करण्यात आली होती. मिशन बिगिन अगेन कार्यक्रमा अंतर्गत शासनातर्फे देण्यात आलेल्या निर्देशांचे पालन करून अभ्यागतांना सिडको कार्यालयात प्रवेश देण्यात येणार आहे. यापुढे अभ्यागतांना सिडको कार्यालयात प्रवेश करतेवेळी ई-पास आणि कलर यंत्रणेद्वारे जारी करण्यात आलेला संबंधित मजल्यावर जाण्यासाठी जारी करण्यात आलेला विशिष्ट रंगाचा पास बाळगणे आवश्यक असणार आहे. ज्या अभ्यागतांनी पूर्व परवानगी घेतली आहे अशाना सर्व कार्यालयीन कामकाजांच्या दिवशी दुपारी 2.00 ते 5.00 या कालावधीत प्रवेश देण्यात येणार आहे. तसेच सर्व विभाग प्रमुखांचे एम एस टीम आयडी सिडकोच्या संकेतस्थळावर उपलब्ध करून देण्यात आले असून त्यावर अभ्यागत त्यांना विहित केलेल्या दिवशी व वेळेत संबंधित विभाग प्रमुखांशी संपर्क साधू शकतील. सिडकोच्या रायगड भवन व इतर नोडल कार्यालयांमध्ये अभ्यागतांना प्रवेश देण्याबाबत यापूर्वी जशी पद्धत सुरू होती त्याप्रमाणेच सुरक्षा विभागाद्वारे संबंधित अधिकार्‍याबरोबर शहानिशा केल्यानंतरच अभ्यागतांना दुपारी 2.00 ते 5.00 या कालावधीत कार्यालयात प्रवेश देण्यात येईल. प्रवेशद्वारावरील सुरक्षा रक्षकांकडून अभ्यागतांचे थर्मल स्क्रीनिंग, ऑक्सिजन पातळी तपासणी करण्यात येईल. तसेच अभ्यागतांनीही कार्यालय आवारात व इमारतीत वावरताना सोशल डिस्टंसींग पाळून मास्कचा वापर करणे बंधनकारक राहिल. मिशन बिगिन अंतर्गत देण्यात आलेल्या या निर्देशांचे पालन न केल्यास कायदेशीर कारवाईला सामोरे जावे लागेल, याची नोंद घेण्यात यावी. 

ज्या अभ्यागतांनी पूर्व परवानगी घेतली नसेल अशांना पुढील विभागनिहाय वेळापत्रकाप्रमाणे दुपारी 2.00 ते 5.00 या कालावधीत प्रवेश देण्यात येईल :

 सोमवार व मंगळवार - अभियांत्रिकी आणि नियोजन विभाग; 

मंगळवार व गुरुवार - वसाहत-1, 2, 3 आणि लेखा विभाग; 

मंगळवार व शुक्रवार - 22.5% भूमी व भूसंपादन, कार्मिक, उपाध्यक्ष तथा व्यवस्थापकीय संचालक तसेच सहव्यवस्थापकीय संचालक-1, 2 व 3 यांचे कार्यालय 

बुधवार व शुक्रवार - दक्षता विभाग, जनसंपर्क विभाग, कॉर्पोरेट प्रोजेक्ट, 12.5% भूमी व भूसंपादन विभाग, अशा प्रकारे विभागणी करण्यात आली आहे.