Breaking News
नवी मुंबई : कोरोना महामारी आणि महागाईचे संकट यामुळे सर्वांचे आर्थिक बजेट कोलमडले आहे. त्यात कांदा-बटाटा, डाळी या जिवनावश्यक वस्तूंच्या किंमती वाढत आहेत. आता सणासुदीच्या तोंडावर खाद्यतेलाचे दरही कडाडल्याने स्वयंपाकघरातील फोडणी महागली आहे. जिवनावश्यक वस्तूंच्या वाढत्या दराने सर्वसमान्यांना चिंता सतावू लागली आहे.
कोरोनाच्या पार्श्वभुमीवर लागलेल्या लॉकडाऊनुळे अनेकांचे रोजगार गेले आहेत. त्यात सगळ्यांच्या वस्तूच्या किंमती दुप्पट झाल्याने सर्वांनाच महागाईचा सामना करावा लागत आहे. जिवनावश्यक वस्तूंच्या किमंती वाढत चालल्याने गृहीणींचे बजेट कोलमडले असून सर्वसामान्यांच्या खिशाला कात्री लागत आहे. स्वयंपाकात महत्वाच्या असणार्या फोडणीसाठी लागणारा कांदा महागल्यानंतर आता तेलानेही उसळी घेतली आहे. सोयाबीन, पाम तेल आणि सूर्यफुल तेल अशा खाद्यतेलांचे भाव वाढले असून शेंगदाणा तेलाच्या दरात घसरण झाली आहे. आंतरराष्ट्रीय बाजार, नैसर्गिक आपत्ती, वाढीव कस्टम ड्युटी आणि तेलाचा कृत्रिमसाठा अशा वेगवेगळ्या कारणांमुळे तेलाच्या दरात वाढ झाल्याचं व्यापार्यांकडून सांगण्यात येत आहे.
मुंबई एपीएमसी मार्केटमध्ये यंदाच्या वर्षी पामतेल जास्त प्रमाणात बाजारात उपलब्ध होणार नाही असा अंदाज वर्तवला जात आहे. इतर खाद्यतेलाच्या भावात देखील मागील आठवड्यात 10 ते 15 रुपयांची वाढ झाली आहे. तसेच, तेलाच्या दरात आणखी भाव वाढ होण्याची शक्यता तेल विकणार्या कंपन्या आणि व्यापार्यांकडून दर्शवली जात आहे. दरवर्षी सोयाबिनच्या तेलाची आवक ही सप्टेंबरमध्ये होते. मात्र, यावर्षी पारतीच्या पावसाने सोयाबीनचे मोठ्या प्रमाणात नुकसान झाल्याने आवक होऊ शकली नाही. काही व्यापार्यांच्या मते तेलाचे भाव वाढणार असल्याचे संकेत होते. त्यामुळे मोठ्या प्रमाणात कृत्रिम साठा केल्याचाही परिणाम तेलाच्या दरावर झाला आहे.
तेल आणि दर
सूर्यफूल तेलाचा आधीच बाजार भाव 15 लिटरच्या डब्यामागे 1500 रुपये इतका होता. तर सध्याचा भाव हा 1700 ते 1800 रुपये इतका आहे. पाम तेलाचा आधीच बाजार भाव हा 1000 ते 1100 रुपये एवढा होता. तर सध्याचा भाव हा 300 रुपयांनी वाढला असून पाम तेल हे 1400 ते 1500 रुपये इतके झाले आहे. मात्र, शेंगदाणा तेलाच्या दरात घसरण पाहायला मिळत आहे. शेंगदाणा तेलाचा आधीच बाजार भाव हा 2400 रुपये इतका होता. मात्र, सध्याचा भाव हा 2100 रुपये इतका झाला आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai