पालिका देणार 25 हजार सानुग्रह अनुदान

नवी मुंबई ः यावर्षीचा दिवाळी सण 14 नोव्हेंबर पासून सुरू होत असून नवी मुंबई महानगरपालिका अधिकारी, कर्मचारी यांची दिवाळी आनंदात जावी याकरिता महापालिका आयुक्त अभिजीत बांगर यांनी सन 2019-20 वर्षाकरिता  महानगरपालिका आस्थापनेवरील अधिकारी, कर्मचारी यांना रू. 25 हजार व करार, तात्पुरत्या स्वरूपातील कर्मचारी यांना रू. 19 हजार सानुग्रह अनुदान जाहीर केलेले आहे. यामुळे पालिका अधिकारी व कर्मचार्‍यांमध्ये आनंदाचे वातावरण आहे. 

महापालिका आस्थापनेवरील अधिकारी,कर्मचारी तसेच राज्य शासनाकडील बदलीने,प्रतिनियुक्ती, प्रशिक्षणार्थी अधिकारी - कर्मचारी यांना रू. 25 हजार सानुग्रह अनुदान दिले जाणार आहे. तसेच किमान वेतनावरील तात्पुरत्या स्वरूपात करार पध्दतीवरील वेतनश्रेणीमध्ये कार्यरत असणारे अधिकारी - कर्मचारी, रोजंदारीवरील आरोग्य सेवक, मानधनावरील बालवाडी शिक्षक व मदतनीस यांना रू. 19 हजार इतकी सानुग्रह अनुदान रक्कम प्रदान केली जाणार आहे. याशिवाय सर्व शिक्षा अभियान व राष्ट्रीय आरोग्य अभियान अंतर्गत शासनाने कंत्राटी तत्वावर नेमलेले व शासनाकडून मानधन प्राप्त होणार्‍या कंत्राटी कर्मचार्‍यांनाही करार पद्धतीवरील कर्मचार्‍यांप्रमाणे रू. 19 हजार इतके सानुग्रह अनुदान त्याचप्रमाणे आरोग्य विभागातील आशा वर्कर यांना रू. 9 हजार सानुग्रह अनुदान देण्यात येणार आहे.

  • पालिकेच्या निर्णयाचे स्वागत
     सध्याच्या कोव्हीड 19 च्या पार्श्वभूमीवर महानगरपालिका अधिकारी, कर्मचारी सुरूवातीपासून कोव्हीड विरोधातील लढ्यात अत्यंत समर्पित भावनेने काम करीत असून त्यांची दिवाळी आनंदात जावी याकरिता प्रशासक तथा आयुक्त  अभिजीत बांगर यांनी घेतलेल्या या कर्मचारीहिताय निर्णयाचे अधिकारी-कर्मचारी वृंदाकडून स्वागत करण्यात येत आहे. 
    महापालिकेच्या आस्थापनावर कार्यरत असलेले कायम स्वरुपी अधिकारी व कर्मचार्‍यांना दरवर्षी दिवाळी सणानिमित्त सानुग्रह अनुदान दिले जाते. त्यात स्थायी समिती आणि सर्वसाधारण सभेने प्रशासनाने सुचविलेल्या रकमेत वाढ करुन सानुग्रह अनुदान मंजुर केले जाते. मात्र यावर्षी कोरोनाच्या पार्श्‍वभुमीवर महापालिकेची निवडणुक न झाल्याने प्रशासकीय राजवट सुरु आहे. सर्व अधिकार आयुक्तांच्या हातात गेले आहेत. त्यामुळे यंदा दिवाळीत किती सानुग्रह अनुदान मिळणार याकडे सर्व अधिकारी व कर्मचार्‍यांचे लक्ष लागले होते. आयुक्तांनी सानुग्रह अनुदानाची रक्कम जाहीर केल्याने सर्व अधिकारी व कर्मचारी वर्गाने समाधान व्यक्त केले आहे.