साईराज शिल्पकला केंद्र जन माणसांसाठी खुले

आ. मनोहर भोईर आणि बबनदादा पाटील यांच्या हस्ते केंद्राचे उद्घाटन

पनवेल : तालुक्यातील शिरढोण गावचे सुपुत्र दिपक महादेव पाटील यांनी जोपासलेल्या कलेचा आदर करून शिवसेनेचे उरण विधानसभेचे आ.मनोहरशेठ भोईर आणि शिवसेनेचे ज्येष्ठ सल्लागार बबनदादा पाटील यांच्या हस्ते साईराज शिल्पकला केंद्राचे उद्घाटन सोमवारी मान्यवरांच्या उपस्थितीत पार पडले.

पनवेल तालुक्यातील शिरढोण या गावातील मुंबई-गोवा महामार्गावरील हमरस्त्यावर दिपक महादेव पाटील यांचे घर आहे. राजकारणातील आपली तळमळ आणि धडपड करीत असतानाच कला क्षेत्रातील त्यांची आवड ही वेगळीच आहे. कलेचे एक वेगळे व्यसन पाटील यांना आहे. कुठलेही शिक्षण न घेता थर्माकोल वरून विविध कलाकृती साकारणारे आणि त्यानंतर थर्माकोल बंदी झाल्याने आपल्या कलेचे काय ? असा प्रश्न त्यांना पडला. त्यानंतर खचून न जाता त्यांनी श्री गणेशाचे डेकोरेशन करीत आपली कला जोपासण्याचे काम सातत्याने सुरू ठेवले. गेल्या दीड वर्षापासून पाटील यांनी धाडस करून पीओपीपासून कलाकृती बनवण्याचा निर्णय घेतला.

सुरुवातीच्या काळात त्यांना सुंदर कलाकृती बनविता आल्या नाहीत. मात्र जिद्द न हरता त्यांनी आपले ध्येय सुरु ठेवले. आणि आज अखेर सुंदर कलाकृती बनवून त्यांनी आपली जिद्द पणाला लावली. या कलाकृतीचे दालन जन माणसांसाठी खुले करावे म्हणून 190 उरण विधानसभा मतदार संघाचे आ.मनोहरशेठ भोईर, शिवसेनेचे रायगड जिल्हा सल्लागार बबनदादा पाटील, परेश पाटील यांच्या प्रमुख उपस्थितीत या शिल्पकला केंद्राचे उद्घाटन करण्यात आले. यावेळी माजी आमदार मनोहरशेठ भोईर यांनी दिपक महादेव पाटील यांना शुभेच्छा दिल्या.