विमानतळाला दि.बा.पाटील यांचेच नाव द्या

रायगड आणि नवी मुंबई मनसेची मागणी 

नवी मुंबई : गत आठवड्यात पालकमंत्री एकनाथ शिंदे यांनी मुख्यमंत्र्याकडे निवेदनाद्वारे नवी मुंबई विमानतळाला शिवसेना पक्षप्रमुख बाळासाहेब ठाकरे यांचे नाव देण्याची मागणी केली. या विमानतळाला दि.बा.पाटील यांचे नाव देण्याची मागणी प्रकल्पग्रस्त सुरुवातीपासून करत आहेत. त्यामुळे नवी मुंबई आतंरराष्ट्रीय विमानतळ प्रकल्पाच्या नावावरून वाद निर्माण झाला आहे. आता मनसेने यात उडी घेत रायगडचे प्रकल्पग्रस्त नेते दिवंगत दि बा पाटलांचे नाव द्या अशी मागणी केली आहे.

नवी मुंबई आंतरराष्ट्रीय विमानतळाच्या नामकरणावरून वाद निर्माण होण्यास सुरुवात झाली आहे. शिवसेना नेते एकनाथ शिंदे यांनी बाळासाहेब ठाकरे यांचे नाव देण्याची मागणी केल्यानंतर याला मनसेने विरोध केला आहे. उभा राहत असलेले विमानतळ रायगड जिल्ह्यात आहे. या भूमीला प्रकल्पग्रस्त चळवळीचा इतिहास आहे. प्रकल्पग्रस्तांसाठी संपुर्ण आयुष्य वेचणार्‍या दिवंगत दि. बा. पाटील यांचे नाव देण्यात यावे अशी मागणी मनसेने पत्रकार परिषद घेत केली आहे. रायगड आणि नवी मुंबई मनसेकडून ही मागणी करण्यात आली आहे. स्थानिक प्रकल्पग्रस्त आगरी-कोळी समाजाची सुरुवातीपासूनची मागणी असताना नगरविकास मंत्री एकनाथ शिंदे यांनी या विमानतळाला बाळासाहेब ठाकरे यांचे नाव द्यावे असे पत्र मुख्यमंत्र्यांना दिल्याने वाद निर्माण झाला आहे. यामुळे नवी मुंबई आणि रायगड मधील स्थानिक प्रकल्पग्रस्तांमध्ये नाराजी निर्माण झाली आहे. आगामी नवी मुंबई महापालिका आणि ग्रामपंचायत निवडणुकी डोळ्यासमोर ठेऊन एकनाथ शिंदे यांनी बाळासाहेब ठाकरे यांच्या नावाचा वापर करण्यास सुरुवात केली असून दि.बा.पाटील यांच्या व्यतिरिक्त कोणाचेही नाव विमानतळास देऊ देणार नाही अशी भूमिका मनसेने घेतली आहे.

नवी मुंबई विमानतळाला लोकनेते स्व. दि. बा. पाटील यांचे नाव देऊन आणि भविष्यात महाराष्ट्रातील एखाद्या मोठ्या, भव्य प्रकल्पाला हिंदुहृदयसम्राट बाळासाहेब ठाकरे यांचे नाव देऊन, तसेच स्व. बाळासाहेबांचे स्मारक लवकर पूर्ण करून दोन्ही महापुरुषांचा योग्य सन्मान राखला जाईल. तशी मुख्यमंत्र्यांनी कार्यवाही करावी अशी विनंती नवी मुंबई मनसेच्या वतीने शहर अध्यक्ष गजानन काळे यांनी केली आहे. दि. बा पाटील यांचं नाव द्यायची मागणी असताना अचानक एकनाथ शिंदे यांनी बाळासाहेब ठाकरे यांचं नाव देण्याची मागणी करत जे राजकारण केलं आहे, ते निंदनीय आहे, असं देखील काळे यांनी म्हटले आहे.