सिडकोतील व्यवहार झाले ऑनलाइन

नवी मुंबई : सिडकोतील सर्व आर्थिक व्यवहार केवळ ऑनलाइन पद्धतीनेच करण्याचा निर्णय व्यवस्थापकीय संचालक लोकेश चंद्र यांनी घेतला आहे. त्यामुळे एक ऑगस्टपासून सिडकोतील कोणतेही शुल्क, घरांचे पैसे, निविदा प्रक्रियेतील अनामत रक्कम फक्त आरटीजीएस, एनईएफटीद्वारेच स्वीकारण्यात येणार आहे. यामुळे सिडकोत कोणत्याही प्रकारचे देयक भरताना अडचणी येणार नाही असा विश्वास सिडकोने व्यक्त केला आहे. 

नुकत्याच समोर आलेल्या काही आर्थिक गैरव्यवहारांमुळे सिडकोची प्रतिमा पुन्हा डागळू लागली आहे. सिडकोची बिघडलेली प्रतिमा सुधारण्याचा प्रयत्न माजी व्यवस्थापकीय संचालक संजय भाटिया यांनी केला होता. आता दिल्लीहून नव्याने आलेले व्यवस्थापकीय संचालक लोकेश चंद्र यांनीही सिडकोची मलिन प्रतिमा सुधारण्याचे प्रयत्न सुरु केले आहेत. 1 ऑगस्टनंतर सिडकोची सर्व प्रकारची शुल्क केवळ ऑनलाइनच स्वीकारली जाणार आहेत. यात स्वप्नपूर्ती, व्हॅलीशिल्प सारख्या घरांच्या थकलेल्या हप्त्यांचाही समावेश आहे. सिडको लवकरच शिल्लक अडीच हजार घरांची नवीन लॉटरी काढणार आहे. तेही ऑनलाइन अदा करावे लागणार आहेत. सिडको दक्षिण नवी मुंबईत काही इमारतींना बांधकाम परवानगी देत आहे. त्याचप्रमाणे कोट्यवधी रुपये किमतीच्या नागरी कामांच्या निविदा व भूखंड विक्री होत असून ही रक्कमही ऑनलाइन भरण्याची सूचना देण्यात आली आहे. त्यामुळे सिडकोत यापुढे एक रुपयादेखील रोख स्वरूपात अथवा डीडी, धनादेशाद्वारे स्वीकारला जाणार नाही. सिडकोचा आर्थिक व्यवहार अतिशय पारदर्शी व्हावा यासाठी हे पाऊल उचलण्यात आले आहे. रोख रक्कम व डीडीमुळे सिडकोत दलालांची ये-जा मोठ्या प्रमाणात सुरू असते, त्यालाही या निर्णयामुळे आळा बसणार आहे. 

सिडकोच्या कामकाजाचा अभ्यास केल्यानंतर कर्मचारी अधिकार्‍यांव्यतिरिक्त काही चेहरे सातत्याने दिसू लागले आहेत. सिडकोत दलालराज असल्याचे स्पष्ट आहे. मानवी हस्तक्षेप कमीत कमी व्हावा यासाठी सिडकोचा सर्व आर्थिक कारभार ऑनलाइन करण्यात येणार आहे. याला सर्वानीच सहकार्य करावे असे आवाहन लोकेश चंद्र यांनी केले आहे.