राज्यस्तरीय एकपात्री अभिनय स्पर्धा उत्साहात

नवी मुंबई ः नवी मुंबई महानगरपालिका आयोजित महापौर चषक राज्यस्तरीय एकपात्री अभिनय स्पर्धा व नवी मुंबई  श्री गणेश दर्शन स्पर्धा पारितोषिक वितरण समारंभ नुकताच वाशी येथील विष्णुदास भावे नाट्यगृह येथे संपन्न झाला. पालिकेच्या या पहिल्याच एकपात्री अभिनय स्पर्धेला कलाकारांचा उत्तम प्रतिसाद मिळाला. 1996 पासून आयोजित केली जाणारी गणेश दर्शन स्पर्धा या उपक्रमाला देखील वाढता प्रतिसाद मिळाला.

नवी मुंबई महानगरपालिकेच्या वतीने विष्णुदास भावे नाट्यगृह येथे अखिल भारतीय मराठी नाट्यपरिषद ऐरोली शाखा यांच्या सहयोगाने संपन्न झालेल्या नवी मुंबई महापौर चषक राज्यस्तरीय एकपात्री अभिनय स्पर्धा त्याचप्रमाणे नवी मुंबई महापौर सार्वजनिक श्रीगणेश दर्शन स्पर्धा 2017 च्या पारितोषिक वितरण सोहळा मोठ्या उत्साहात पार पडला. यावेळी नाट्य, मालिका, सिनेक्षेत्रातील नामांकित कलावंत अखिल भारतीय मराठी नाट्यपरिषदेचे अध्यक्ष प्रसाद कांबळी, मराठी बाणा कार अशोक हांडे, अभिनेते राजन भिसे, अभिनेत्री मधुरा वेलणकर-साटम, अदिती सारंगधर, धनश्री क्षिरसागर, अभिनेते संदेश जाधव आदी लोकप्रिय रंगकर्मींची मंचावर उपस्थिती होती. अभिनय स्पर्धेच्या अंतिम फेरीचे परीक्षण सुप्रसिध्द नाटककार प्रेमानंद गज्वी, अभिनेत्री मौसमी तोंडवळकर, अभिनेते कमलेश सावंत या मान्यवरांनी केले.

नवी मुंबई महानगरपालिकेच्या वतीने अखिल भारतीय नाट्यपरिषद ऐरोली शाखेच्या सहयोगाने आयोजित नवी मुंबई महापौर चषक राज्यस्तरीय एकपात्री अभिनय स्पर्धा यामध्ये कुमार गटाच्या प्राथमिक फेरीत 81 अभिनेत्यांनी सहभाग घेतला. त्यामधील पाच निवडक अभिनेत्यांची सुरेश लाड व सानिका वाणी या परीक्षकांनी अंतिम फेरीसाठी निवड केली होती. अंतिम फेरीत प्रज्ञा साबळे, आकांक्षा ठोंबरे, आर्यन जळगावकर, सिध्दी सर्णेकर यांना अनुक्रमे चार क्रमांकाची पारितोषिके प्रदान कऱण्यात आली. कविता दरगुडे उत्तेजनार्थ पारितोषिकाची मानकरी ठरली. त्याचप्रमाणे खुल्या गटाच्या प्राथमिक फेरीत 148 अभिनेत्यांनी सादरीकरण केले. त्यामधून संदेश जाधव, श्रीहरी पवळे, अमित राय या परीक्षकांनी 7 अभिनेत्यांची अंतिम फेरीसाठी निवड केली होती. अंतिम फेरीतून सचिन सकपाळ, प्रशांत धुमाळ, भाग्यश्री पाणे, सुषमा वर्मा यांना अनुक्रमे चार क्रमांकाची पारितोषिके प्रदान करण्यात आली. सिध्देश शिंदे हा उत्तेजनार्थ पारितोषिकाचा मानकरी ठरला.

शिवछाया मित्र मंडळाची बाजी 

नवी मुंबई महापौर सार्वजनिक श्रीगणेश दर्शन 2017 मध्ये शिवछाया मित्र मंडळ तुर्भे हे नवी मुंबई महानगरपालिका क्षेत्रातील सर्वोत्कृष्ट गणेशोत्सव मंडळाचे मानकरी ठरले. लोकमान्य टिळक जनकल्याण उत्सव समिती, सेक्टर 8 ए नेरुळ हे व्दितीय, लोकमान्य सेवा समिती सेक्टर 4 ऐरोली हे तृतीय तसेच नाखवा सिताराम भगत सांस्कृतिक उत्सव मंडळ सोनखार सानपाडा हे चौथ्या आणि सार्वजनिक गणेशोत्सव मंडळ सेक्टर 17 वाशी हे संपूर्ण महापालिका क्षेत्रातील पाचव्या क्रमांकाचे मानकरी ठरले. त्यासोबतच सर्वोत्कृष्ट देखावा, समाजप्रबोधनात्मक विषयानुरुप सजावट, आकर्षक मुर्ती, स्वच्छता व शिस्तबध्दता या चार क्षेत्रांसाठी प्रत्येकी पाच मंडळांना रोख पारितोषिकांसह स्मृतिचिन्हे प्रदान करण्यात आली. नाट्यदिग्दर्शक संदेश उपशाम, लेखक संदीप गचांडे, नेपथ्यकार संदेश बेंद्रे, पत्रकार योगेश पिंगळे व वास्तुविशारद महाविद्यालय प्राचार्य हरिश शेट्टी यांनी गणेश दर्शन स्पर्धेचे परीक्षण केले.