विद्यार्थी वाहनांची तपासणी करण्यासाठी विशेष मोहिम

विद्यार्थ्यांना नाहक शिक्षा देणारे अधिकारी दोषी आढळल्यास कारवाई

पनवेल ः विद्यार्थ्यांच्या सुरक्षेची दक्षता घेताना नवी मुंबईतील सर्व शाळांमधील विद्यार्थी वाहनांची विशेष करून तपासणी केली जाईल. संबंधित शाळांचे प्राचार्य, मुख्याध्यापक यांनी समन्वयाची भूमिका बजावली पाहिजे. पालकांनीही थोडी दक्षता घ्यावी तसेच त्या चालकांची सेवा, चारित्र्य पडताळणी यासाठी विशेष मोहिम राबविण्याचे आदेश वाहतुक खात्याचे पोलिस उपायुक्त सुनील लोखंडे यांनी दिले. पनवेल येथील विद्यार्थ्यांना नाहक त्रास सोसावा लागल्याने संबंधित वाहतुक अधिकारी आणि कर्मचार्यांची चौकशी करून उचित निर्णय घेतला जाईल, अशी ग्वाही त्यांनी संघर्ष समितीला दिली.

पनवेल शहरात दोन दिवसांपूर्वी विद्यार्थी वाहन चालकावर कारवाई करताना शाळेतून परतणार्या विद्यार्थ्यांची रखडपट्टी केली होती. त्यामुळे सातवीमध्ये शिकणार्या विद्यार्थ्यांना वाहतुक पोलिसांचा विचित्र अनुभव आला. यासंदर्भात पालकांनी विचारणा केल्यानंतर अधिकार्यांनी मुजोरपणे उत्तरे दिली होती. हा सारा प्रकार कायद्याचे उल्लंघन करणारा असल्याने पनवेल संघर्ष समितीने सहाय्यक पोलिस निरीक्षक सप्रे आणि त्यांच्या अन्य साथीदारांवर निलंबनाची कारवाई करण्याची मागणी करणारे निवेदन लोखंडे यांना नवी मुंबईतील त्यांच्या कार्यालयात देण्यात आले. त्याप्रसंगी सहाय्यक पोलिस आयुक्त अरूण पाटील तर संघर्षच्या वतीने अध्यक्ष कांतीलाल कडू, ज्येष्ठ सदस्य उज्वल पाटील, सचिव चंद्रकांत शिर्के, पत्रकार सुरज म्हात्रे आदी मान्यवर उपस्थित होते.

नवी मुंबईच्या तत्कालीन पोलिस आयुक्तांनी वाहतुक नियमनासंदर्भात काढलेल्या अध्यादेशाची पायमल्ली होत आहे. पनवेल शहरातून अवजड आणि अतिज्वलंतशिल रसायन वाहून नेणार्या वाहनांना बंदी असताना, सर्रासपणे अवजड वाहतूक सुरू असल्याचे संघर्ष समितीने लोखंडे आणि पाटील यांच्या निदर्शनास आणून दिले. त्याशिवाय खासगी बेकायदेशिर प्रवासी वाहतूकीला वाहतुक खात्याचे अभय असल्याचे सांगितले. त्यामधून होणारी आर्थिक उलाढालही लक्षात आणून दिली.

दंडात्मक कारवाई हा वाहतुक नियंत्रणाचा भाग होऊ शकत नाही, अशी ग्वाही उपायुक्त लोखंडे यांनी धाडसाने आणि तितक्याच प्रांजलपणे दिली. नियमांचे उल्लंघन कुणीही करू नये. वाहतूक खात्याच्या अधिकारी, कर्मचार्यांनी सलोखा राखून वाहतुक नियंत्रण करण्याकडे लक्ष दिल्यास वादाचे प्रसंग निर्माण होणार नाहीत, असे मत मांडले.

पनवेल शहरातील विद्यार्थ्यांना त्रास झाला असल्यास संबंधितांची चौकशी करून दोषी आढळल्यास त्यांच्यावर कारवाई केली जाईल, असे आश्वासन त्यांनी दिले. त्यानंतर पनवेल महापालिका क्षेत्रातील वाहतुक कोंडीची समस्या सोडविण्यासाठीची दीड तास सविस्तर चर्चा करण्यात आली.