Breaking News
नवी मुंबई ः कॅनडामध्ये सुपरवायझरपदाची नोकरी मिळवून देण्याचे आमिष दाखवून एका टोळीने सानपाडा भागात रहाणार्या व्यक्तीला तब्बल सात लाख 91 हजार रुपयांना गंडा घातल्याचा प्रकार उघडकीस आला आहे. सानपाडा पोलिसांनी या टोळीविरोधात फसवणुकीसह अपहाराचा गुन्हा दाखल करून त्याचा शोध सुरू केला आहे.
सानपाडा सेक्टर 10मध्ये कुटुंबासह राहणारा तक्रारदार कृष्णराव शिंदे (44) याने सप्टेंबर महिन्यामध्ये वेगवेगळ्या वेबसाइटवर नोकरीसाठी अर्ज केले होते. काही दिवसांतच अज्ञात टोळीने कृष्णराव याला नोकरीसाठी ईमेल पाठवून दिला. कृष्णराव याने ईमेलला प्रतिसाद दिल्यानंतर या टोळीतील निकोलस नावाच्या व्यक्तीने कॅनडा देशातील ग्रीन गार्डन लाइव्ह फार्म हाऊस कंपनीचा मॅनेजर असल्याचे सांगून त्याच्याशी संपर्क साधला. तसेच, त्याला सुपरवायझरपदाच्या नोकरीसाठी निवडण्यात येत असल्याचे सांगून त्याच्याकडून शैक्षणिक कागदपत्रे व त्याची सर्व माहिती मागून घेतली. त्यानुसार कृष्णराव याने स्वत:ची सर्व माहिती ईमेलवरून पाठवून दिल्यानंतर तीन दिवसांतच त्याला ईमेलद्वारे ऑफर लेटर पाठविण्यात आले. तसेच, त्याला व्हिजासाठी 25 हजार रुपये भरण्यास सांगण्यात आले. जर संपूर्ण कुटुंबाला कॅनडा देशात जायचे असल्यास त्याला व्हिजासाठी एक लाख रुपये भरावे लागतील, असे सांगून भारतीय एजंट अमिना बोमन ईरानी हिच्याशी संपर्क साधण्यास सांगण्यात आले. त्यानुसार कृष्णकुमारने अमिनाशी संपर्क साधून तिला सर्व शैक्षणिक कागदपत्रे व पासपोर्ट पाठवून दिल्यानंतर एजंट अमिता हिने बँकखात्याची माहिती पाठवून देऊन त्यावर एक लाख रुपये पाठविण्यास सांगितले. त्यानुसार कृष्णकुमारने एक लाख रुपयांची रक्कम पाठवून दिली.
त्यानंतर एजंट अमिना हिने कुटुंबाच्या वैद्यकीय विम्यासाठी, वर्क परमिट बनविण्यासाठी, टॅक्ससाठी अशी वेगवेगळी कारणे सांगून कृष्णकुमार याला वेगवेगळ्या बँक खात्यात रोख रक्कम पाठविण्यास सांगितले. त्यानुसार कृष्णकुमार एनएफटीद्वारे व आरटीजीएसद्वारे पैस पाठवित राहिला. अशा पद्धतीने टोळीने कृष्णकुमार याच्याकडून महिनाभरातच तब्बल सात लाख 91 हजारांची रक्कम उकळली. मात्र त्यानंतरही टोळीने आणखी तीन लाख 50 हजार रुपये पाठविण्यास सांगितले. अखेर संशय आल्यानंतर त्याने पैसे पाठविणे बंद केले. त्यानंतर त्याने सानपाडा पोलिस ठाण्यात तक्रार दाखल केली.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai