इटीसी केंद्र बंद कालावधीत अभिनव उपक्रम

विशेष मुलांच्या ऑनलाईन शिक्षण, प्रशिक्षणाचा 

नवी मुंबई ः कोरोना व्हायरसपासून बचाव करण्याकरिता 16 मार्च ते 31 मार्च 2020 या कालावधीत पालिकेच्या इटीसी अपंग शिक्षण प्रशिक्षण व सेवासुविधा केंद्र बंद ठेवण्यात आले आहेत. कालावधीत विशेष मुलांच्या प्रशिक्षणात खंड पडू नये यासाठी सर्वांचे आरोग्य चांगले राहावे हा उद्देश नजरेसमोर ठेवून इटीसी केंद्र संचालक डॉ. वर्षा भगत यांच्या संकल्पनेतून मुलांसाठी नाविन्यपूर्ण उपक्रम हाती घेण्यात आला आहे. त्यानुसार प्रत्येक विशेष शिक्षकाने दररोज किमान 03 वर्कशीट, वर्ग सहाय्यकाने 02 वर्कशीट तसेच सह शालेय  शिक्षकाने 01 वर्कशीट बनवणे तसेच थेरपिस्ट व मानसोपचार तज्ज्ञ यांनीही आपल्याकडे थेरपी घेत असलेल्या मुलांचा विचार करून घरी करता येतील अशा साप्ताहिक अक्टिव्हिटीज तयार करणे अशा नाविन्यपूर्ण कामांस सुरूवात केली आहे.

सुट्टी जाहीर झाल्याच्या दिवसापासून या वर्कशीट अक्टिव्हिटी होम प्लानला सुरूवात करण्यात आली आहे. दररोज प्रत्येक शिक्षक व थेरपिस्ट हे इटीसी केंद्राच्या व्हॉट्स अप समुहावर या वर्कशीट पाठवतात. यामध्ये दररोज सरासरी 500 हून अधिक क्टिव्हिटीज पाठवल्या जातात. अशाच प्रकारे शिक्षक - पालक आणि थेरपिस्ट - पालक यांचे स्वतंत्र व्हॉट्स अप समुह असून त्यावरही या वर्कशीट पाठवण्यात येतात. यामध्ये प्रत्येक मुलाचा स्वतंत्र विचार करून शैक्षणिक साहित्य बनवण्यात येत आहे. गरजेनुसार फोन कॉल, व्हिडीओ कॉल, व्हॉट्स अप, ई मेल यांचा उपयोग करून प्रत्येक पालकाच्या संपर्कात राहून त्यांच्या विशेष मुलासाठी नवनवीन तर्‍हेचा विकसित अभ्यास दिला जात आहे. याची माहिती दररोज इटीसी केंद्र संचालकांना दिली जाते. या उपक्रमामुळे कर्मचारी व पालक हे दोघेही मिळालेली सुट्टी ही सत्कारणी लागत असल्याबद्दल समाधानी आहेत. विशेष मुलांच्या शिक्षण - प्रशिक्षणामध्ये खंड पडू नये यासाठी सर्वच विशेष शिक्षक, प्रशिक्षक वेगवेगळया वर्कशीट बनवत आहेत. दररोज शिकवताना मुले समोर असतात, त्यामुळे त्यांना प्रतिसादानुसार शिकवले जाते. परंतू आता मुले प्रत्यक्ष समोर नसल्याने विचारपूर्वक वर्कशीट बनवाव्या लागतात. त्यामुळे घरी असलो तरी मुलांचा विचार सातत्याने मनात असतो असा अनुभव विशेष शिक्षकांनी सांगितला आहे.

व्यवसायोपचार तज्ज्ञ, भौतिकोपचार तज्ज्ञ व श्रवण वाचा तज्ज्ञ यांनांही पालकांकडून सकारात्मक प्रतिसाद मिळत असल्याचे दिसून येत आहे. यात घरातील कोणते साहित्य वापरून, कोणत्या कौशल्यांचा विकास करता येईल, याबाबत पालकांना मार्गदर्शन केले जात आहे. तसेच मानसोपचार तज्ज्ञ हे देख्रील मुलांसाठी विविध कृतीशील प्रयोग तयार करत आहेत. त्यामध्ये काही अक्टिव्हिटीज घरातील सर्व सदस्यांनी मिळून अथवा भावंडांनी मिळून करण्यायोग्य दिल्या जात असल्याने विशेष मूल ही सर्वांची जबाबदारी आहे हा संदेश पोहोचवला जात आहे. या उपक्रमामुळे मुलांना घरात राहूनही अभ्यास करता येत आहे तसेच काही प्रयोगशील वर्कशीटमुळे हा केवळ साचेबध्द अभ्यास न वाटता आनंददायी अनुभव घेता येतो व त्यामुळे मुले घरामध्ये राहूनही व्यस्त राहत आहेत व विनाकारण जनसंपर्कात येणे टाळणेही शक्य होत आहे.