Breaking News
मुंबई : कोरोना महामारीमुळे सर्वांचीच आर्थिक घडी विस्कटली आहे. आधीच आर्थिक टंचाईने सर्वसामान्यांचे कंबरडे मोडले आहे. त्यात आता टोल दरवाढीचा भुर्दंड देखील सहन करावा लागणार आहे. मुंबईच्या प्रवेशद्वारावर असलेल्या टोलच्या दरांमध्ये येत्या 1 ऑक्टोबरपासून वाढ केली जाणार आहे. ही वाढ पाच रुपयांपासून ते पंचवीस रुपयांपर्यंत असेल. तसेच मासिक पासच्या दरात देखील वाढ करण्यात येणार आहे. लोकल बंद असताना, टोल दरवाढीमुळे मुंबईत ये-जा करणार्या लाखो वाहनधारकांच्या खिशाला आता आणखी कात्री लागणार आहे.
वेगवेगळ्या पाच मार्गांनी मुंबईत प्रवेश करता येतो. दहिसर, ऐरोली, वाशी, आनंद नगर (मुलुंड) आणि लाल बहादूर शास्त्री मार्ग (मुलुंड) या पाचही प्रवेशद्वारांवर एमईपी कंपनीचे टोल नाके आहेत. मुंबईत बांधलेल्या 55 उड्डाणपुलाच्या उभारणीचा खर्च वसूल करण्यासाठी हे टोलनाके उभारण्यात आले होते. महाराष्ट्र राज्य रस्ते विकास महामंडळासोबत झालेल्या एमईपी कंपनीच्या करारानुसार 2002 ते 2027 अशा पंचवीस वर्षांसाठी मुंबईच्या प्रवेशद्वारांवर टोल वसूल करण्यात येणार आहे. तसेच दर तीन वर्षांनी या टोलच्या किंमतीमध्ये वाढ करण्याची तरतूद या करारात आहे. त्यामुळेच 2017 नंतर आता 2020 मध्ये टोल दर वाढ केली जात आहे.
एक ऑक्टोबरपासून या टोलचे नवीन दर लागू होतील. त्यानुसार कार, जीपसारख्या चारचाकी हलक्या वाहनांच्या एकेरी प्रवास दरात पाच रुपयांची वाढ करण्यात आल्याने, त्यांना 35 रुपयांच्या ऐवजी चाळीस रुपये टोल द्यावा लागेल. मिनी बससारख्या मध्यम वाहनांच्या टोल दरात 10 रुपयांनी वाढ होऊन तो 55 रुपयांवरून 65 रुपये करण्यात आला आहे. ट्रक आणि बसच्या टोल दरात 105 वरून 130 अशी 25 रुपयांची वाढ करण्यात आली आहे. तर अवजड वाहनांचा टोल 135 रुपयांवरून 160 रुपये असा वाढविण्यात आला आहे. हलक्या वाहनांच्या मासिक पासातही वाढ झाली आहे. केवळ एका टोलसाठी असलेला मासिक पास आता 1240 रुपये करण्यात आला असून पाचही टोल नाक्यांसाठी असलेला मासिक पास आता 1400 रुपयांऐवजी 1500 रुपये होणार आहे.
लोकल बंद असल्याने मध्यमवर्गीय कर्मचार्यांना रास्तेमार्गाने प्रवास करावा लागत आहे. या रस्त्यात खड्डे आणि त्यामुळे होणारे ट्राफिक रोजची डोकेदुखी झाली आहे. त्यात आता टोलदरात वाढ केल्याने आर्थिक फटकाही सर्वसामान्यांना बसणार आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai