Breaking News
भाजप-राष्ट्रवादीत अर्थकारणावरुन आरोप-प्रत्यारोपांंच्या फैरी
नवी मुंबई ः नवी मुंबई महापालिका निवडणुकीचे बिगुल वाजताच पक्षांतराबरोबर मतदार याद्याही चांगल्याच प्रकाश झोतात आल्या आहेत. मतदान यादीत 90 हजार बोगस नावे घुसवण्यासाठी अधिकारी वर्गाने लाखो रूपये घेतले असल्याचा गंभीर आरोप गणेश नाईक आणि शशिकांत शिंदे यांनी केला आहे. भाजप आणि महाविकास आघाडीने मतदार यादीवरुन केलेल्या गंभीर आरोपाने राजकीय पक्षातील यादवी समोर आल्याने मतदारांत संभ्रम निर्माण झाला आहे.
16 फेब्रुवारीला नवी मुंबई पालिका निवडणुकीसाठी मतदार याद्या प्रसिद्ध करण्यात आल्या. या प्रारुप मतदार याद्यांमध्ये मोठ्या प्रमाणात फेरफार करण्यात आल्याचा प्रकार उजेडात आला आहे. या प्रकरणात महापालिका अधिकार्यांची मिलीभगत आहे. पालिका अधिकार्यांकडूनच मतदार यादीत फेरफार केला जात असल्याची तक्रार नाईक यांनी पालिका आयुक्त अभिजित बांगर यांच्याकडे केली आहे. मतदार याद्यांमध्ये अशाप्रकारे चुका केल्या गेल्या असतील तर त्या तातडीने सुधाराव्यात अन्यथा कार्यकर्त्यांसह महापालिकेला घेराव घालण्याचा इशाराही नाईक यांनी यावेळी दिला. शिवाय संबंधित प्रभाग अधिकारी, सहायक आयुक्त, आयुक्त, जिल्हाधिकारी, कोंकण आयुक्त विधान परिषद विरोधी पक्षनेते यांच्याकडे तक्रार करणार असल्याचंही नाईक यांनी सांगितलं. त्यावरही कारवाई न झाल्यास उच्च नायालयात धाव घेणार असल्याचा इशारा नाईक यांनी दिला आहे.
दुसरीकडे प्रकाशित करण्यात आलेल्या मतदार याद्यांमध्ये 90 हजार बोगस मतदार घुसविण्यात आल्याचा आरोप राष्ट्रवादीचे नेते शशिकांत शिंदे यांनी पत्रकार परिषदेत घेवून केला आहे. बोगस नावे मतदान याद्यांमध्ये घुसविण्यात नवी मुंबईतील स्थानिक भाजपा नेत्यांचा हात आहे. यासाठी अधिकार्यांना हाताशी धरून एका मताच्या मागे दीड हजार रूपये देण्यात आल्याचा गंभीर आरोप शशिकांत शिंदे यांनी केला. जोपर्यंत नव्याने फेर मतदार याद्या तयार केल्या जात नाहीत, तोपर्यंत निवडणूक पुढे ढकलण्याची मागणी शिंदे यांनी केली आहे. यापूर्वी शिवसेनेतील एक दाम्पत्य आरक्षणासाठी कोर्टात गेले होते. शिवाय संपूर्ण नवी मुंबईतील प्रत्येक यादीत पाचशे ते सहाशे बोगस मतदार असल्याचा आरोप केला होता. त्यामुळे प्रभाग आरक्षण, प्रभाग रचना आणि याद्यांमध्ये पालिका अधिकारी भ्रष्टाचार करत असल्याचा प्रकार उजेडात आला आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai