रसना बार सात दिवसांसाठी सील

बेलापूर येथील डी मार्टला 50 हजाराचा दंड

नवी मुंबई ः कोव्हीडचा वाढता प्रसार रोखण्यासाठी महापालिका आयुक्त अभिजीत बांगर यांनी नवीन आदेश जारी केले असून त्यानुसार आस्थापनांनी कोव्हीड सुरक्षा नियमांच्या अनुषंगाने उपाययोजना करणे गरजेचे आहे. याचे उल्लंघन करणार्‍या आस्थापनांवर कारवाई करण्यात येत आहे. त्यानुसार तुर्भेतील रसना बारने दुसर्‍यांदा नियमांचे उल्लंघन केल्याने हा बार सात दिवसांसाठी सील करण्यात आला आहे. 

आस्थापनांसाठी सुधारित नियमावली करण्यात आली आहे. त्यानुसार नियमांचे उल्लंघन होऊन मोठ्या प्रमाणावर गर्दी झाल्याचे आढळल्यास पहिल्या वेळी रू. 50 हजार रक्कमेचा दंड, दुसर्‍या वेळी उल्लंघन झाल्यास 7 दिवसांकरिता आस्थापना बंद ठेवण्याची कारवाई तसेच तिसर्‍यांदा उल्लंघन होत असल्याचे निदर्शनास आल्यास केंद्र सरकारमार्फत कोव्हीड 19 महामारी संपल्याचे जाहीर होत नाही तोपर्यंत आस्थापना पूर्णपणे बंद करण्याची कारवाई करण्यात येईल असे स्पष्टपणे आदेशित करण्यात आले होते. त्यानुसार यापूर्वी 50 हजार रूपयांची दंडात्मक कारवाई होऊनही रात्री 8 नंतरही रेस्टॉरंट-बार सुरू ठेवणार्‍या तसेच सुरक्षित अंतराच्या नियमांचे उल्लंघन करणार्‍या सेक्टर 23 तुर्भे येथील रसना बारवर महानगरपालिकेच्या विशेष दक्षता पथकाने धडक कारवाई करीत सात दिवसांसाठी सदर बार सिलींग करण्यात आलेला आहे. त्याचप्रमाणे सेक्टर 15 सीबीडी बेलापूर येथील डी मार्टनेही सुरक्षित अंतराच्या नियमाचे मोठ्या प्रमाणावर उल्लंघन केल्याप्रकरणी त्यांच्यावर 50 हजार दंडात्मक रक्कमेची कारवाई करण्यात आलेली आहे. नवी मुंबई महानगरपालिकेच्या विशेष दक्षता पथकांमार्फत कोव्हीड 19 च्या प्रतिबंधात्मक नियमांचे उल्लंघन करणार्‍या व्यक्ती व आस्थापनांवर कारवाई करण्यात येत असून यापुढील काळात ही कारवाई अधिक तीव्र करण्यात येणार आहे.