Breaking News
नवी मुंबई ः पालिका क्षेत्रात आत्तापर्यंत 2 लाख 51 हजार 355 नागरिकांचे लसीकरण झालेले असून सध्या लसीचा पुरवठा कमी प्रमाणात होत असल्याने लसीकरणाच्या गतीमध्ये अडथळे निर्माण होत आहेत. जास्तीत जास्त नवी मुंबईकर नागरिकांचे लसीकरण व्हावे याकरिता कोव्हीड 19 लस खरेदी करण्यासाठी ग्लोबल टेंडर प्रसिध्द करण्याचे पालिका आयुक्तांनी नियोजित केले आहे.
नवी मुंबईची लोकसंख्या साधारणत: 15 लक्ष असून त्यामध्ये 18 वर्षावरील नागरिकांची अंदाजित 10 लक्ष 80 हजार इतकी लोकसंख्या विचारात घेता आत्तापर्यंत 2.51 लक्ष नागरिकांनी पहिला डोस घेतला असून त्यातील 58 हजार नागरिकांनी दुसरा डोस घेतला आहे. अशा रितीने साधारणत: 8 लक्ष 29 हजार नागरिकांचे प्रथम डोसचे लसीकरण प्रलंबित आहे. त्यामुळे शासनाकडून प्राप्त लसींचा पुरवठा लक्षात घेऊन लवकरात लवकर लसीकरण होण्याच्या दृष्टीने लस खरेदी प्रक्रिया राबविली जात आहे. मुंबई महापालिकेच्या धर्तीवर कोव्हीड 19 लस खरेदी करण्यासाठी ग्लोबल टेंडर प्रसिध्द करण्याचे पालिकेने नियोजित केले आहे. याकरिता ग्लोबल टेंडर प्रसिध्द करून लवकरात लवकर लस खरेदी करण्याची प्रक्रिया तत्परतेने करण्यात येत आहे. 1 मे 2021 च्या केंद्र सरकारच्या मार्गदर्शक सूचनांनुसार कोव्हीड लस उत्पादकांमार्फत एकूण उत्पादन केलेल्या लसीचा 50 टक्के साठा केंद्र सरकारला दिला जात असून उर्वरित लस राज्य शासन, खाजगी संस्था व कंपन्यांना देण्यात येत आहे. त्यात नवी मुंबई महानगरपालिकेस प्राप्त लस पुरवठा लक्षात घेता नागरिकांच्या लसीकरणात होणारा विलंब या लस खरेदीमुळे टाळला जाईल. अशा सर्व गोष्टींचा विचार करूनच महापालिका आयुक्त अभिजीत बांगर यांनी सद्यस्थितीत 4 लक्ष लसीचे डोसेस खरेदी करण्याचे प्रस्तावित केले असून त्याकरिता ग्लोबल टेंडर प्रसिध्द करण्यात येत आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai