म्युकरमायकोसिस रूग्णशोधासह मोफत तपासणी

उपचाराकरिता महानगरपालिका क्रियाशील ;  आयुक्तांनी साधला व्हिडिओ क्लिपव्दारे संवाद

नवी मुंबई ः कोव्हीडच्या दुसर्‍या लाटेची तीव्रता काहीशी ओसरत असल्याचे दिसत असतानाच मागील काही दिवसांपासून म्युकरमायकोसिस अर्थात काळी बुरशीच्या रूपाने एक नवीनच संकट आपल्यापुढे उभे राहिलेले आहे. या संकटावर मात करण्यासाठी नवी मुंबई महानगरपालिका दक्ष असून म्युकरमायकोसिसचा प्रभाव रोखण्यासाठी रूग्णशोध, तपासणी आणि उपचार अशा प्रकारची यंत्रणा सज्ज केली असल्याचे पालिका आयुक्त अभिजीत बांगर यांनी समाज माध्यमांच्या माध्यमातून व्हिडिओ क्लिपव्दारे नागरिकांशी संवाद साधत ‘घाबरू नका पण दक्षता घ्या’ असे आवाहन करीत ‘महानगरपालिका आपल्या सोबत आहे’ असा विश्वास दिला आहे.

म्युकरमायकोसिसशी संबंधित चर्चा सुरू झाल्याबरोबर त्याच दिवशी आयुक्तांनी तातडीने नवी मुंबई सिटी टास्क फोर्स आणि म्युकरमायकोसिसशी संबंधित उपचार करणार्‍या नवी मुंबईमधील रूग्णालयांतील तज्ज्ञ डॉक्टरांशी वेबसंवादाव्दारे सविस्तर चर्चा करीत महानगरपालिकेचा म्युकरमायकोसिस संबंधित कृती आराखडा तयार केला आणि त्वरित अंमलबजावणीला सुरूवात करण्यात आली. या कार्यवाहीच्या समन्वयासाठी या क्षेत्रातील अनुभवी नोडल अधिकार्‍याची नेमणूक करण्यात आली. महानगरपालिकेच्या वाशी, नेरुळ व ऐरोली येथील तिन्ही सार्वजनिक रुग्णालयात म्युकरमायकोसिस बाबत तपासणी करण्याकरिता बाह्यरुग्ण सुविधा कक्ष कार्यान्वित करण्यात आले. याठिकाणी गरज भासल्यास डायग्नोस्टिक टेस्ट्सची व्यवस्था करण्यात आली. त्यासोबतच महानगरपालिकेच्या वाशी सार्वजनिक रूग्णालयात म्युकरमायकोसिस वरील रूग्णांवर उपचाराची सुविधा उपलब्ध करून देण्यात आली. त्यातूनही एखाद्या रूग्णाला शस्त्रक्रियेची गरज भासली तर ही शस्त्रक्रिया गुंतागुतीची असल्याने शहरातील नामांकीत सर्जनचे एक पॅनल बनविण्यात आले असून आवश्यकतेनुसार त्यांच्या सेवा उपलब्ध करून घेतल्या जाणार आहेत. म्युकरमायकोसिस बाबत तिन्ही महापालिका रूग्णालयाच्या ओपीडी मधील तपासणी, टेस्ट्स तसेच वाशी रूग्णालयातील उपचार विनामूल्य केले जातील असेही आयुक्तांनी जनसंवादामध्ये आश्वस्त केले आहे. नवी मुंबई महानगरपालिका शहरातील रूग्णांना प्राधान्याने औषध कसे उपलब्ध होईल याबाबत महापालिका दक्ष असून ज्यांना परवडत नाही त्यांना औषध मोफत उपलब्ध करून दिले जाईल असे आयुक्तांनी स्पष्ट केले आहे.लक्षणे दिसू लागल्यानंतर जर रूग्णाने लगेच तपासणी केली नाही व त्यामुळे उपचारास काहीसा विलंब झाला तर हा आजार गंभीर स्वरूप घेऊ शकतो. त्यामुळे लवकर उपचार सुरू होणे हे अतिशय महत्वाचे आहे हे लक्षात घेत कोरोनोवरील उपचारांसाठी रूग्णालयात दाखल झालेल्या व ज्यांना कोमॉर्बिडिटी विशेषत्वाने डायबेटिस आहे अशा व्यक्तींवर विशेष लक्ष देण्याच्या दृष्टीने नवी मुंबई महानगरपालिकेच्या कॉल सेंटरव्दारे संपर्कास सुरूवात करण्यात आल्याची माहिती आयुक्तांनी दिली.

6 हजाराहून अधिक रूग्णांना कॉल सेंटरव्दारे संपर्क
म्युकरमायकोसिस करिता कोरोनामुक्त झाल्यानंतर साधारणत: 6 आठवड्यांच्या कालावधीत काळजी घेणे गरजेचे आहे हे लक्षात घेत 1 एप्रिलपासून रूग्णालयातून कोरोनामुक्त होऊन घरी परतलेल्या 6 हजाराहून अधिक रूग्णांना कॉल सेंटरव्दारे संपर्क साधण्यात आला. कॉल सेंटरच्या माध्यमातून केल्या जाणार्‍या संभाषणांमधून जाणवलेल्या 69 व्यक्तींच्या म्युकरमायकोसिस ओपीडी मधून तपासणी व टेस्ट्स करण्यात आल्या असून त्यामध्ये कोणत्याही व्यक्तीस म्युकरमायकोसिसची लागण झाल्याचे आढळलेले नाही.
14 रुग्ण नवी मुंबईतील 
नवी मुंबईत म्युकरमायकोसिसचे 29 रूग्ण असून त्यातील 14 रूग्ण हे नवी मुंबई महानगरपालिका क्षेत्रातील व 15 रूग्ण हे इतर शहरांतील असल्याचे स्पष्ट करीत आयुक्तांनी नवी मुंबई क्षेत्रातील रूग्णालये ही उच्च दर्जाच्या आरोग्य सेवा पुरविणारी असल्याने व म्युकरमायकोसिसच्या उपचारासाठी मल्टि स्पेशालिटी रूग्णालयाची गरज असल्याने इतर शहरांतील रूग्णही इथे दाखल होत असल्याची माहिती दिली आहे. तथापि नवी मुंबई महापालिका सर्वच रूग्णांना उच्च दर्जाची सेवा देण्यासाठी कटिबध्द असल्याचेही त्यांनी म्हटले आहे.