Breaking News
वर्षभरात 53 हजार घरांमध्ये मोफत पुस्तके देणार ; राज ठाकरे यांच्या वाढदिवसानिमित्त नवी मुंबई शहराध्यक्ष गजानन काळे यांचा उपक्रम
नवी मुंबई ः महाराष्ट्र नवनिर्माण सेनेचे अध्यक्ष राज ठाकरे यांच्या 53 व्या वाढदिवसानिमित्त नवी मुंबई मनसेचे शहर अध्यक्ष गजानन काळे यांनी वर्षभरात 53 हजार घरांमध्ये मोफत पुस्तक वाटपाचा संकल्प केला आहे. काळे यांनी स्वतः घरोघरी पुस्तक वाटून या कार्यक्रमाचा शुभारंभ केला. ‘एक कुटुंब एक पुस्तक’ या पद्धतीने गजानन काळे यांच्यासह मनसेच्या अनेक पदाधिकार्यांनी शेकडो पुस्तके घरोघरी देऊन पुस्तक वाटपाच्या कार्यक्रम हाती घेतला आहे.
14 जून 2021 ते 14 जून 2022 पर्यंत हे अभियान चालू राहणार आहे. मनसेचे कार्यकर्ते यापुढेही जशी पुस्तकाची नोंदणी होईल तशी पुस्तके घरोघरी जाऊन देणार आहेत. पुस्तके घेऊन लोकांशी भेटताना लोकांनी या अभिनव उपक्रमाचे तोंडभरून कौतुक केले. पुस्तक वाटप करताना लोकांमध्ये एवढा उत्साह होता कि अनेक लोकांनी आरती ओवाळून मनसे पदाधिकार्यांचे स्वागत केले. लहानांपासून ते ज्येष्ठांपर्यंत सर्वांनी पुस्तकांची नोंदणी केल्याचे दिसून येते. या उपक्रमात भारतरत्न डॉ. अब्दुल कलाम यांचे अग्निपंख, डॉ. जयसिंगराव पवार यांचे छत्रपती संभाजी एक चिकित्सा, प्रबोधनकार ठाकरे यांचे माझी जीवनगाथा, मंगेश पाडगावकरांचे जिप्सी या पुस्तकांना प्रचंड मागणी असल्याचे दिसून आले. मनसेने पुस्तक निवडण्यासाठी दिलेली 100 मराठी पुस्तकांची यादी अनेक वाचकांना आवडली. काही वाचकांनी इतर लेखकांची पुस्तके यादीत समाविष्ट करावी असेही मनसे पदाधिकार्यांना सुचवले आहे. तरी काही वाचकांनी इंग्रजी पुस्तके हि या उपक्रमात समाविष्ट करावी असे सुचवले आहे. नवी मुंबईकरांच्या मागणीनंतर नवीन पुस्तके समाविष्ट करण्याचा प्रयत्न करू असे गजानन काळे यांनी सांगितले आहे.
नवी मुंबईतील नागरिकांनी मोठ्या संख्येने या वाचन चळवळीत सहभाग नोंदवून वाचन संस्कृती वृद्धांगित करण्यासाठी सहकार्य करावे असे आवाहन गजानन काळे यांनी केले आहे. घरोघरी पुस्तक वाटपाच्या कार्यक्रमात उप शहर अध्यक्ष सविनय म्हात्रे, शहर सचिव सचिन कदम, शहर सहसचिव अभिजीत देसाई, मनविसे शहर संघटक संदेश डोंगरे, रोजगार विभागाचे शहर संघटक सनप्रीत तुर्मेकर, शारीरिक सेना शहर अध्यक्ष सागर नाईकरे, विभाग अध्यक्ष अमोल आयवळे, अक्षय भोसले, विनोद पाखरे, उप विभाग अध्यक्ष निलेश जाधव, मंगेश जाधव, शाखा अध्यक्ष नरहरी कुंभार, अक्षय कदम, प्रमोद डेरे हे उपस्थित होते.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai