Breaking News
नवी मुंबई : वाशीमध्ये 2 ऑगस्ट रोजी सापडलेल्या सत्तर वर्षीय महिलेच्या मृतदेहाचं गूढ उकलण्यात पोलिसांना यश आले आहे. आरोपीने 70 वर्षीय महिलेला जेवणासाठी बोलावून तिच्यावर अतिप्रसंग करण्याचा प्रयत्न केला होता. मात्र महिलेने विरोध करताच बाजूला पडलेल्या काचेने गळा चिरुन तिची हत्या केली. वाशी पोलीसांनी 20 दिवसाच्या प्रयत्नांनंतर अखेर सीसीटीव्ही फुटेजच्या आधारे आरोपीला अटक केली आहे.
वाशी रेल्वे स्टेशन लगत पामबीच मार्गावरील पुलाखाली 2 ऑगस्ट रोजी सकाळी नऊ वाजताच्या सुमारास एका महिलेचा मृतदेह गोणीत अर्धवट भरलेल्या स्थितीत सापडला होता. मृतदेह शवविच्छेदनासाठी मनपा रुग्णालयात पाठवला होता. त्याच्या दोन्ही हातावर विशिष्ट प्रकारची डिझाईन गोंदवलेली दिसून आली. त्याव्यतिरीक्त कोणतेही नाव, पत्ता ओळखण्या इतपत वस्तू, कागदपत्रे मिळाली नव्हती. त्यावरुन घटनास्थळी मिळालेली चप्पल, कपडे या व्यतिरिक्त कोणतेही ओळख पटवण्याचे साधन पोलिसांकडे नव्हते. मात्र मृतदेहाच्या हातावरील गोंदण हाच एक धागा आशादायी वाटत होता. त्यावरून मृतदेहाची ओळख पटवणे ही पहिली पायरी आणि नंतर खुनाचा गुन्हा उघडकीस आणण्यासाठी वरिष्ठांच्या मार्गदर्शनाखाली तपास अधिकारी पोलीस निरीक्षक प्रमोद तोरडमल यांच्या नेतृत्वाखाली पथके तयार करण्यात आली. मुंबई शहर, ठाणे शहर आणि नवी मुंबई शहरातील पोलीस ठाण्यामध्ये पोलीस पथकांनी जाऊन मृतदेहाशी मिळत्या जुळत्या वर्णनाच्या महिलांची मिसिंग प्रकरणे वेगवेगळी करुन त्याचा अभ्यास केला. त्यावेळी मृतदेहाशी मिळत्या जुळत्या वर्णनाची मिसिंग प्रकरण गोवंडी पोलीस ठाण्यात नोंद असल्याचे दिसून आले. या गुन्ह्याच्या तपासासाठी 20 दिवस, मुंबईची 12 कक्ष, ठाणे 5 कक्ष, नवी मुंबई 20 पोलीस ठाणे तसेच रागयड मधील पोलीस यंत्रणा काम करत होती. मृतदेह कुजलेल्या अवस्थेत मिळाला असल्याने त्याची ओळख पटवणे कठीण झाले होते. तरी पोलिसांनी केवळ टॅटूच्या सहाय्याने जवळपास 150 ते 200 सीसीटीव्ही तपासून गुन्ह्याची उकल केली आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai