Breaking News
नवी मुंबई : बाइकला मोठा आवाज असलेल्या सायलेन्सरच्या आवाजाने ध्वनी प्रदूषण होते तसेच नागरिकांना त्रास होत असल्याने अशा गाड्यांना अनेक ठिकाणी बंदी घालण्यात आली आहे. नवी मुंबई वाहतूक पोलिसांनी देखील मोठा आवाज असलेले सायलेंसर
लावलेल्या बाईकवर विशेष मोहीम राबवून कारवाई करण्यास सुरुवात केली आहे. या विशेष मोहिमेदरम्यान वाहतूक पोलिसांनी 233 दुचाकी वाहन चालकावर कारवाई करून त्यांच्या दुचाकीला लावण्यात आलेले मॉडिफाइड सायलेन्सर जप्त केले आहेत. त्यामुळे दुचाकीला मॉडिफाइड सायलेन्सर बसवून त्याद्वारे ध्वनी प्रदूषण करणार्या दुचाकी चालकांचे धाबे दणाणले आहेत.
बुलेट गाडीला कंपनीकडून लावण्यात आलेले सायलेन्सर काढून अनेक जण कर्णकर्कश आणि कानठळ्या बसवणारे सायलेन्सर लावतात. या सायलेन्सरमुळे ध्वनी प्रदूषण होत असल्याच्या तक्रारी नागरिकांकडून करण्यात येत असल्याने या तक्रारीची दखल घेऊन नवी मुंबई वाहतूक पोलिसांनी बुलेटच्या सायलेन्सरवर कारवाईला सुरुवात केली आहे. त्यासाठी वाहतूक पोलिसांकडून (पान 7 वर)
विशेष मोहीम राबविण्यात येत आहे. त्यानुसार वाशी, सीवूड्स, खारघर आणि पनवेल या वाहतूक शाखेने गत 3 महिन्यामध्ये आपापल्या हद्दीत विशेष मोहीम राबवून 233 बुलेटचे सायलेन्सर कापून जप्त केले आहेत. या कारवाईत वाशी वाहतूक शाखेने सायन-पनवेल मार्गासह वाशीतील अंतर्गत मार्गावर एकूण 70, सीवूड्स वाहतूक शाखेने पाम बीच मार्गावर-89 , खारघर वाहतूक शाखेने आपल्या हद्दीत 68 तर कळंबोली व पनवेल वाहतूक शाखेने प्रत्येकी 3 बुलेटच्या सायलेन्सरवर कारवाई करून ते जप्त केले आहेत. ही कारवाई यापुढेही सुरू राहणार असून ही कारवाई टाळायची असल्यास, ज्यांनी आपल्या बुलेटला मॉडिफाइड सायलेन्सर लावून घेतले आहेत, त्यांनी ते स्वतःहून काढून टाकावेत. अशा पद्धतीचे सायलेन्सर बसवून देणार्या गॅरेजवाल्यावर देखील कडक कारवाई करण्यात येणार असल्याची माहिती नवी मुंबई वाहतूक विभागाचे उपायुक्त पुरुषोत्तम कराड यांनी दिली.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai