Breaking News
नवी मुंबई ः ‘स्वच्छ भारत मिशन’ अंतर्गत स्वच्छ सर्वेक्षण 2021 मध्ये ओडीएफ कॅटेगरीमध्ये ओडीएफ डबल प्लसच्या पुढील सर्वोच्च वॉटरप्लस मानांकन नवी मुंबई महानगरपालिकेस जाहीर झाले असून वॉटरप्लस मानांकन संपादन करणारे नवी मुंबई हे महाराष्ट्र राज्यातील एकमेव शहर आहे. हे सर्वोच्च मानांकन संपादन करण्यामध्ये नागरिकांच्या सक्रीय सहभागाचा अत्यंत महत्वाचा वाटा असल्याने नवी मुंबईकर नागरिकांचे अभिनंदन करण्यासाठी व त्यांचे आभार व्यक्त करण्यासाठी महापालिका आयुक्त अभिजीत बांगर यांच्या संकल्पनेतून आयोजित करण्यात आलेल्या चित्ररथ प्रदर्शनाला सर्वच ठिकाणी नागरिकांचा उदंड प्रतिसाद लाभला.
सीवूड येथील ग्रँड सेंट्रल मॉल समोरून सुरू झालेल्या या चित्ररथ प्रदर्शनाचे सीवूड, नेरूळ, वाशी, कोपरखैरणे येथील नागरिकांनी ठिकठिकाणी उत्स्फुर्त स्वागत करीत या अभिनव उपक्रमाची प्रशंसा केली. आकर्षक विद्युत रोषणाई पुष्पमाळांनी सजलेल्या या चित्ररथावर ‘वॉटर प्लस’ मानांकनाचे प्रतिकचिन्ह शीर्षस्थानावर झळकत होते. त्याखाली नागरिकांचे वॉटर प्लस मानांकनाबद्दल अभिनंदन करणारा फलक लावण्यात आला होता तसेच सर्वोच्च वॉटर प्लस मानांकन मिळविणारे नवी मुंबई हे राज्यातील एकमेव शहर आहे अशा आशयाचा स्वच्छ नवी मुंबई मिशनचे ब्रँड अॅम्बेसेडर तथा सुप्रसिध्द गायक संगीतकार शंकर महादेवन यांचे छायाचित्र असलेला मोठा फलक लक्ष वेधून घेत होता. या चित्ररथावर आरंभ क्रिएशन्सच्या नृत्य कलावंतांनी स्वच्छता गीतांप्रमाणेच भारतीय लोककला व संस्कृती यावर आधारित नृत्यगीतांचे सीवूड ते कोपरखैरणे इतक्या मोठ्या अंतरभर कलात्मक सादरीकरण करून नागरिकांचे लक्ष वेधून घेतले. चित्ररथासोबत स्पेशल इफेक्टव्दारे मार्गाच्या शेजारील इमारतींच्या भिंतींवर वॉटरप्लस मानांकनाबद्दल नागरिकांचे अभिनंदन करणार्या प्रकाशमय इमेजेस देखील आकर्षणाचा केंद्र होते.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai