Breaking News
कामासाठी लागणारा निधी एमएमआरडीए देणार
पनवेल : रोहिंजन येथे 24 मीटर रुंदीच्या रस्त्याचे काँक्रीटीकरण, गटार बांधणे आणि तलावावर पुलाचे बांधकाम करणे या कामांकरिता ठाकूर इन्फ्रा’ या कंपनीला ठेका देण्यास स्थायी समितीने गेल्या गुरुवारी मंजुरी दिली. या सभेत 65 कोटींच्या कामांना मंजुरी देण्यात आली.
गणेशोत्सवाच्या पूर्वसंध्येला झालेल्या स्थायी समितीच्या बैठकीत 46 विषय मांडण्यात आले. त्यापैकी 44 विषयांना मंजुरी देण्यात आली. यामध्ये मलनिस्सारण वाहिन्या, अंतर्गत गटारे, मासळी बाजार, रस्ते काँक्रीटीकरण, डांबरीकरण अशा स्वरूपांच्या जवळपास 65 कोटी रुपयांच्या कामांना मंजुरी दिली. ठाकूर इन्फ्रा प्रोजेक्टस प्रा. लि. याकंपनीलाच रोहिंजन येथील रस्त्याच्या कामासाठी 24 कोटी 54 लाख रुपयांचे कंत्राट देण्याचा निर्णय घेण्यात आला. पनवेल महापालिकेतील सत्ताधारी भाजपचे नेते रामशेठ ठाकूर हे या कंपनीचे सल्लागार आणि त्यांची पत्नी संचालक आहे. ठाकूर यांचे पुत्र परेश हे सदस्य असलेल्या स्थायी समितीनेच या कंत्राटदाराच्या नेमणुकीच्या प्रस्तावास गेल्या आठवड्यात मंजुरी दिली. यावेळी चर्चेदरम्यान परेश ठाकूर यांनी तटस्थ राहण्याची भूमिका घेतल्याची नोंद करण्यात आली.
कामाचा संपूर्ण खर्च हा एमएमआरडीए करणार आहे. एमएमआरडीए या कामासाठी लागणारा निधी महापालिकेला टप्प्याटप्याने देणार आहे. या निधीचा पहिला टप्पा 16 कोटी रुपये एमएमआरडीएने महापालिकेकडे वर्ग केला आहे. उर्वरित निधी ठरल्याप्रमाणे एमएमआरडीए आवश्यकतेनुसार महापालिकेकडे वर्ग करणार आहे.
ज्या ठिकाणी रस्त्याचे काम होणार आहे त्या ठिकाणी अद्याप ही रेसिडेंशल एरिया झालेली नाही त्यामुळे 25 कोटीचा खर्च कशासाठी करतो असा सवाल विरोधी पक्षनेते प्रीतम म्हात्रे यांनी विचारला. तिसरी लाट येऊ घातली आहे त्यासाठी हे पैसे खर्च करावेत अशी मागणी विरोधी पक्षनेते प्रीतम म्हात्रे यांनी केली आहे. विकास कामांना विरोधी पक्षाचा नेहमीच पाठिंबा असेल मात्र हे काम जेथे सुरु होणार आहे तेथे शेतकर्यांना डावलू नका असे विरोधी पक्षनेते प्रितम म्हात्रे यांनी पत्रकार परिषदेत स्पष्ट केले. इतर चार कंपन्यांच्या तुलनेत ठाकूर इन्फ्रा या कंपनीने 10 टक्के कमी दराने निविदा भरली होती. या कंपनीचा कामाचा दांडगा अनुभव असून कामासंदर्भातील सर्व संबंधित आवश्यक कागदपत्रांचीही पूर्तता या कंपनीने केलेली होती, तसेच कामांची हमीसुद्धा या कंपनीने पालिकेला दिली आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai