Breaking News
नवी मुंबई ः महाराष्ट्र राज्य विधीसेवा प्राधिकरण, मुंबई तसेच ठाणे जिल्हा विधीसेवा प्राधिकरणाच्या निर्देशानुसार येत्या 25 सप्टेंबर 2021 रोजी सीबीडी येथील न्यायालयात राष्ट्रीय लोक अदालतीचे आयोजन करण्यात आले आहे. या लोक अदालतीमध्ये दिवाणी, फौजदारी, वैवाहिक स्वरुपाची, तसेच 138 एन.आय.ऍक्ट खालील चेक संबंधीची दाखल झालेली, बँक वसुलीची, महानगरपालिका कर वसूल संदर्भातील दाखलपूर्व प्रकरणे निकाली काढण्यात येणार आहेत.
कोविड-19 सारख्या गंभीर साथीच्या आजारात बरीच प्रकरणे प्रलंबित राहिली आहेत. त्यामुळे पक्षकारांना त्यांची प्रकरणे सामंजस्याने आणि तडजोडीने मिटविण्यासाठी प्रत्यक्ष संधीच या लोकन्यायालयाने उपलब्ध करुन दिली आहे. या लोक अदालतीमध्ये वादपूर्व प्रकरणांचा बँक, पतसंस्था, वीजमंडळ, इंटरनेट, फोन व मोबाईल संस्था याचे ग्राहकांसोबत असलेले वाद संपुष्टात आणता येणार आहेत. यासाठी त्यांना कोणतेही न्यायालीन किंवा इतर शुल्क देण्याची आवश्यकता नाही. तसेच ग्राहकांना देखील त्यांची बाजू मांडून थकीत बीले नियमित करुन घेता येणार आहे. या लोकअदालतीमध्ये जे पक्षकार हजर राहू शकत नाहीत, त्यांच्याकरीता ऑनलाईन पध्दतीचा वापर करण्यात येत असून त्यासाठी पक्षकारांना आपला मोबाईल क्रमांक तसेच ईमेल आयडी विधीतज्ञांमार्फत अथवा स्वत: उपस्थित राहून द्यावा लागणार आहे. दि.22 ते 24 सप्टेंबर 2021 पर्यंत पक्षकार व विधीज्ञ हे ऑनलाईन किंवा प्रत्यक्ष आपल्या प्रकरणातील समस्यांवर न्यायालयासमोर चर्चा करुन सामोपचाराने प्रकरण मिटवू शकणार आहेत. त्यामुळे त्यांना 25 सप्टेंबरपर्यंत चर्चेला वेळ मिळू शकणार आहे. त्याचप्रमाणे ज्या आरोपींचे गुन्हे तडजोडीस पात्र आहेत,त्या गुह्यातील फिर्यादींना तडजोड करता येणार आहे. तसेच किरकोळ स्वरुपाच्या गुह्यात आरोपीची इच्छा असल्यास आरोपी गुन्हा कबुल करुन सदर प्रकरण निकाली काढू शकणार आहे.
लोकन्यायालय मध्ये दिवाणी स्वरुपाची तडजोडीस पात्र व दाखलपूर्व जास्तीत जास्त प्रकरणे सामंजस्य आणि तडजोडीने निकाली काढण्यात येणार असल्यामुळे या लोकअदालतीत जास्तीत जास्त लोकांनी सहभागी होऊन 20 सफ्टेंबर 2021 पर्यंत आपले तडजोडीचे अर्ज संबंधित न्यायालयात दाखल करावे, असे आवाहन तालुका विधी सेवा समिती, वाशी, नवी मुंबईच्या अध्यक्षा टी.एम.देशमुख-नाईक यांनी केले आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai