Breaking News
22 ऑक्टोबरपासून वाजणार नाट्यगृहात तिसरी घंटा
नवी मुंबई ः शासन निर्णयानुसार 22 ऑक्टोबर पासून नवी मुंबई महानगरपालिकेच्या वाशी येथील विष्णुदास भावे नाट्यगृह देखील नाट्यप्रयोग व सांस्कृतिक कार्यक्रमांसाठी नव्याने सज्ज झाले आहे. त्यामुळे रंगमंच व प्रेक्षागृह याची स्वच्छता व निर्जंतुकीकरण करून घेण्याचे काम युध्दपातळीवर सुरु आहे.
कोव्हीडची पहिला लाट ओसरल्यानंतर जानेवारी महिन्यापासून नाट्यगृहामध्ये 50 टक्के उपस्थितीमध्ये प्रयोगांना सुरुवात झाली होती. तथापि कोव्हीडच्या दुसर्या लाटेत रुग्णसंख्या वाढू लागल्यानंतर एप्रिल महिन्यापासून प्रयोग बंद करण्यात आले होते. एप्रिल महिन्यापासून बंद असलेल्या नाट्यगृहांतील तिसरी घंटा महाराष्ट्र शासनाच्या पर्यटन व सांस्कृतिक कार्य विभागाने जारी केलेल्या शासन निर्णयानुसार 22 ऑक्टोबर पासून पुन्हा वाजणार आहे. ब्रेक द चेन - अद्ययावत सूचना यानुसार मार्गदर्शक तत्वांच्या आधिन राहून नियंत्रित स्वरुपात नाट्यगृहे सुरु करण्यास परवानगी देण्यात आलेली आहे. त्यामुळे पालिकेचे वाशीतील विष्णुदास भावे नाट्यगृहही नाट्यप्रयोग व विविध कार्यक्रमांसाठी सज्ज झाले आहे.
नवी मुंबई महानगरपालिकेने 22 ऑक्टोबर ते 31 डिसेंबर या कालावधीत नाट्यप्रयोग, सांस्कृतिक कार्यक्रम, संगीताचे कार्यक्रम, इतर करमणुकीचे कार्यक्रम, परिषद, संमेलने आयोजित करण्यासाठी विविध संस्था / व्यक्ती यांचे अर्ज मागविण्याकरिता जाहिरात प्रसिध्द केली होती. त्यानुसार आता विष्णुदास भावे नाट्यगृह एकूण आसन क्षमतेच्या 50 टक्के मर्यादेत कोव्हीड नियमावलीचे पालन करून रसिकांच्या उत्साही प्रतिसादात सुरु होणार आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai