Breaking News
नवी मुंबई ः महापालिकेने सीसीटीव्ही यंत्रणा नवी मुंबईत कार्यान्वित करण्यासाठी नव्याने निविदा मागवल्या आहेत. यापुर्वी मागवलेल्या निविदेला अंदाजपत्रकीय रक्कमेपेक्षा 100 टक्के अधिक रक्कमेचा देकार आल्याने पालिकेने ही निविदा प्रक्रिया रद्द करुन नव्याने निविदा प्रक्रिया सुरु केली आहे. 154 कोटींच्या या निविदेला ईच्छुक ठेकेदारांनी 29 ऑक्टोबरपुर्वी आपला देकार द्यायचा असून यावेळी किती रक्कमेचा देकार येतो याकडे पालिकेच्या अभियांत्रिकी विभागाचे लक्ष लागले आहे.
पालिकेच्या शहर अभियंता विभागाकडून 154 कोटी रुपये खर्च करुन सीसीटीव्ही यंत्रणा उभारण्यासाठी फेरनिविदा काढली आहे. यापुर्वी सल्लागार केपीएमजीने बनवलेल्या निविदेला 271 कोटींचा देकार आला होता. संबंधित ठेकेदाराने 250 कोटींपेक्षा कमी रक्कमेवर काम करण्यास नकार दिल्याने पालिका आयुक्तांनी याबाबत व्हिजेटीआय, आयआयटी आणि सिडॅक पुणे या संस्थांच्या तज्ज्ञ लोकांची समिती गठित करुन त्यांच्या अहवालावर निविदा प्रक्रिया रद्द केली होती. शहर अभियंता विभागाने नवीन सल्लागाराची नेमणुक करुन अद्यावत तंत्रज्ञानाच्या आधारे नवीन अंदाजपत्रक बनवल्याचे बोलले जात आहे.
यामध्ये 1400 कॅमेरे संपुर्ण शहरात बसवण्यात येणार असून त्यामध्ये 650 कॅमेर्यांच्या जागा या नवी मुंबई पोलीस आयुक्तालयाने सुचवलेल्या आहेत. संबंधित प्रस्तावात 800 कॅमेरे हे स्थानिक लोकप्रतिनिधींनी सुचवल्याने अंतर्भुत करण्यात आले आहेत. ठाणे-बेलापुर रोड, सायन-पनवेल महामार्ग आणि पामबीच मार्गावर 80 स्पीड कंट्रोल कॅमेर्यांच्या माध्यमातून गाड्यांच्या वेगावर नजर ठेवण्यात येणार आहे. महापालिकेने यापुर्वी बसवलेले 252 कॅमेरे बदलण्याची तरतूद या निविदेत असून सूमारे लीज लाईन भाड्यापोटी 40 कोटींचा खर्च अपेक्षित आहे. नव्याने मागवलेल्या निविदा प्रक्रियेत ईच्छुक ठेकेदारांची निविदापुर्व बैठक झाली असून त्यांनी सूचवलेल्या बदलांचा स्विकार करत त्यादृष्टीने संबंधित ठेकेदारांना निविदापुर्व बैठकीचे इतिवृत्त देण्यात आले आहे. ईच्छुक निविदाकारांनी आपला देकार 29 ऑक्टोबरपुर्वी द्यायचा आहे. यापुर्वी अंदाजपत्रकीय रक्कमेपेक्षा 100 टक्के अधिक रक्कमेचा देकार आल्याने यावेळी पालिकेचा शहर अभियंता विभाग कमी देकारासाठी देव पाण्यात ठेवून बसले आहेत.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai