Breaking News
10 रुपयांपासून प्रवासी भाडे सुरु ; सेवा सुरु होण्याआधीच मेट्रोचे प्रवासदर जाहीर
नवी मुंबई : गेल्या दहा वर्षापासून नवी मुंबई मेट्रोचे काम सुरु आहे. या ना त्या कारणाने रखडलेली ही सेवा सुरु होण्याआधीच सिडकोकडून मेट्रोचे प्रवास दर जाहीर केले आहेत. त्यामुळे हे दर 10 रुपयांपासून सुरु होणार आहेत. त्यामुळे सर्वसामान्यांनाही मेट्रो प्रवास करणे शक्य होणार आहे. असे असले तरी प्रत्यक्षात ही सेवा कधी सुरु होते याकडे नवी मुंबईकरांचे लक्ष लागले आहे.
सिडकोने नवी मुंबईतील सार्वजनिक वाहतूक अधिक सक्षम करण्याच्या दृष्टीने चार मेट्रो मार्गाचा आराखडा तयार केला आहे. त्यातील पहिल्या मार्गाची सुरुवात मे 2012 रोजी करण्यात आली होती. 11 किलोमीटर मार्गाच्या या कामाचा शुभारंभ करताना सिडकोने हा मार्ग डिसेंबर 2016 पर्यंत सुरू होईल असे जाहीर केले होते. मात्र कंत्राटदारांच्या काम चुकारपणामुळे हा मार्ग गेली सहा वर्षे रखडला आहे. गेल्या वर्षी हे काम महाराष्ट्र मेट्रोकडे सुपूर्द करण्यात आल्यानंतर या कामाला वेग आला आहे. ऑक्टोबर महिन्यात रिसर्च डिझाइन अन्ड स्टॅण्डर्ड ऑर्गनायझेशनने केलेली ऑसिलेशन चाचणी पूर्ण झाली आहे. आता केवळ मेट्रो सुरक्षा आयुक्तालयाच्या प्रमाणपत्राच्या प्रतीक्षेत ही सेवा आहे.
सिडकोने या मार्गावरील दर जाहीर केले आहेत. सिडकोचे व्यवस्थापकीय संचालक मुखर्जी यांनी बुधवारी या दराचे पत्रक एका ट्वीटद्वारे जाहीर केले आहे. या दर पत्रकात पहिल्या दोन किलोमीटरसाठी दहा रुपये तिकीट दर आहे तर त्यापुढील दोन किलोमीटरसाठी 15 रुपये दर आकारण्यात येणार आहे. चार ते सहा किलोमीटर पर्यंतच्या मेट्रोच्या थंडगार प्रवासासाठी प्रवाशांना केवळ वीस रुपये मोजावे लागणार आहेत. विशेष म्हणजे नवी मुंबई पालिकेच्या परिवहन सेवेच्या वातानुकूलित बसच्या बेलापूर ते खारघर या सेवेच्या तिकिटापेक्षा या मेट्रो सेवेचा दर पाच रुपयांनी कमी आहेत. ही सेवा या महिन्यात सुरू होणार होती मात्र ती आता पुढील वर्षांच्या आरंभी होण्याची शक्यता असून भारतीय रेल्वे सुरक्षा आयुक्तांच्या प्रमाणपत्राची यासाठी आवश्यकता आहे.
लवकरात लवकर सुरू होणार्या नवी मुंबई मेट्रोचे दर सिडकोने निश्चित केले असून ते स्थानिक परिवहन सेवेच्या वातानुकुलित दरापेक्षा कमी आहेत. पहिल्या टप्प्यात सुरू होणार्या या सेवेचे संचालन महामेट्रोच्या वतीने केले जाणार असून सिडको आता केवळ मेट्रो सुरक्षा आयुक्तालयाच्या प्रमाणपत्राच्या प्रतीक्षेत आहे. -डॉ. संजय मुखर्जी, व्यवस्थापकीय संचालक, सिडको
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai