Breaking News
आमदार गणेश नाईकांचा विधानसभेत गौप्यस्पोट
नवी मुंबई : नगरविकास विभागाने सिडकोच्या भूखंडांवर नवी मुंबई महानगरपालिकेने टाकलेल्या आरक्षणाबाबत दिलेल्या आदेशावर आक्षेप घेतला आहे. त्याचबरोबर एमआयडीसीने ठाणे-बेलापूर रोड लगतच्या सर्व्हिस रोडवर वितरित केलेल्या भूखंडामुळे वाहतुकीचा गंभीर प्रश्न उभा राहिल्याचे सांगत एमआयडीसीच्या कार्यालयात दलालांचा सुळसुळाट झाल्याने हे प्रकार होत असल्याचा घणाघाती आरोप आमदार गणेश नाईक यांनी हिवाळी अधिवेशनात केला आहे. एमआयडीसी आणि नगर विकास विभागाच्या कारभाराची चौकशी करण्याची मागणी उपमुख्यमंत्री अजित पवार यांच्याकडे त्यांनी करून खळबळ उडवून दिली आहे.
नवी मुंबई महानगरपालिकेच्या सर्वसाधारण सभेने सिडकोच्या 232 भूखंडांवर आरक्षण प्रस्तावित केल्याने महापालिका क्षेत्रात सिडकोला मोकळे भूखंड विकणे अशक्य झाले आहे. यामुळे सिडकोने नगर विकास विभागाला विनंती करून महापालिकेने टाकलेले आरक्षण हटवण्याची मागणी केली होती. ही मागणी मान्य करत नगर विकास विभागाने महाराष्ट्र प्रादेशिक व नगर रचना अधिनियम 1966 चे कलम 154 अन्वये आदेश जारी करून पालिकेला 500 चौरस मीटर पेक्षा अधिक भूखंडांवर आरक्षण टाकण्यास बंदी घातली आहे. शुक्रवारी विधानसभा अधिवेशनात नगरविकास विभागाच्या पूरक मागण्यांच्या चर्चेवेळी आमदार गणेश नाईक यांनी जोरदार आवाज उठवत नगर विकास विभागाच्या कारभाराची लक्तरे वेशीवर टांगली. नवी मुंबई शहराची वाढ होत असताना नागरिकांना सेवा सुविधा देण्यासाठी लागणारे भूखंड उपलब्ध करून देणे ही सिडकोची जबाबदारी असताना सिडकोने शहरातील सगळे मोकळे भूखंड विकण्याचा सपाटा लावल्याचा गंभीर आरोप यावेळी केला. हे भूखंड नगर विकास विभाग व सिडको अधिकारी आणि संबंधित विकासक यांच्या साटेलोट्यामुळे विकत असल्याचा आरोप करत या भूखंड विक्रीबाबत तसेच आरक्षणाच्या आदेशाबाबत चौकशी करण्याची मागणी उपमुख्यमंत्री अजितदादा पवार यांच्याकडे केली आहे. नगर विकास विभागाला आरक्षण उठवण्याबाबत आदेश देण्याचे कोणतेही अधिकार नसताना ते कोणाच्या सांगण्यावरून देण्यात आले याचीही चौकशी करण्याची मागणी त्यांनी केली. या आरक्षित भूखंडाचे पैसे नवी मुंबई महापालिका सिडकोला देईल याची हमी गणेश नाईक यांनी विधानसभेत दिली. नाईक यांनी यावेळी एमआयडीसीच्या कारभारावरही तोंडसुख घेत महापे येथील एमआयडीसीच्या कार्यालयात दलालांचा सुळसुळाट झाल्याने कोठेही भूखंड वितरित केले जात असल्याचा आरोप केला. ठाणे बेलापूर रोड लगतच्या सर्व्हिस रोडवर हॉटेलचे भूखंड वितरित केल्याने तेथे आता वाहतुकी कोंडीला सामोरे जावे लागत असल्याचे सांगत यात लक्ष घालण्याची विनंती त्यांनी पवार यांच्याकडे केली. नाईकांच्या या मागणीला उपमुख्यमंत्री अजित दादा पवार कशा पद्धतीने उत्तर देतात याकडे आता नवी मुंबईकरांचे लक्ष लागले आहे. आपल्या निवेदनात नाईक यांनी शरद पवार यांची स्तुती करत शिवसेनेकडे असलेल्या एमआयडीसी आणि नगर विकास विभागाच्या तुघलकी कारभारावर बोट दाखवून एका दगडात दोन पक्षी मारल्याची चर्चा विधानसभेत आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai