Breaking News
रुग्णालयाच्या भुखंडासाठी पालिका सिडकोला देणार 107 कोटी
नवी मुंबई : शहरात शासकीय रुग्णालय व महाविद्यालय उभारणीसाठी सिडकोकडून बेलापूर येथे एक मोठा भूखंड पालिकेला देण्यात आला आहे. यासाठीचे 107 कोटी रुपये भरण्यास पालिकेला सांगण्यात आले होते. मात्र पालिका यासाठी टाळाटाळ करीत होती. मात्र आ.मंदा म्हात्रे यांनी सतत पाठपुरावा केल्याने आता पालिका प्रशासन ही रक्कम भरण्यास तयार झाले आहे. मात्र हे रुग्णालय मोफत बांधून द्यावे अशी मागणी आ. गणेश नाईक यांनी केल्याने पुन्हा एकदा भाजपच्या दोन आमदारांमध्ये समन्वय नसल्याचे समोर आले आहे.
कोरोनाकाळात पालिकेला अनेक खासगी रुग्णालयांच्या रुग्णशय्या भाड्याने घेऊन उपचार करावे लागले आहेत. त्यामुळे सार्वजनिक रुग्णालयाची गरज अधोरिखित झालेली आहे. बेलापूरच्या आमदार मंदा म्हात्रे यांनी मुख्यालयाजवळील खारफुटी संवर्धनात अडकलेला भूखंड सिडकोला सुचविला असून पालिका या भूखंडाचे सवलतीचे दर भरण्यास तयार असल्याचे सांगून पालिकेला भुखंड मिळवून देण्यासाठी प्रयत्न केले आहेत. पालिका या भूखंडाची किंमत देण्यास तयार असल्यास सिडकोने भूखंड देण्याची तयारी दर्शवली असून वनविभागाचे अडथळे दूर केल्यानंतर या भूखंडाचा ताबा पालिकेला दिला जाणार आहे. यासाठी मुख्यमंत्री उद्धव ठाकरे यांनी सिडकोला तसे आदेश दिलेले आहेत. म्हात्रे यांनी यासाठी ठाकरे यांची भेट घेतली होती. मात्र, पालिकेच्या तिजोरीतून कोट्यवधी रुपये खर्च करून हा भूखंड विकत घेणे योग्य नाही. नवी मुंबईतील जनतेसाठी सार्वजनिक हिताचे सर्व भूखंड सिडको व एमआयडीसीने मोफत देण्याची भूमिका नाईक यांनी मांडली आहे तर त्याला छेद देणारी भूमिका म्हात्रे यांनी जाहीर केली आहे. पालिकेकडे पैसे असून जनतेच्या हितासाठी सिडकोकडून भूखंड खरेदी करणे गैर नाही, असे त्यांनी जाहीर केलेे. म्हात्रे यांच्या भूमिकेला पाठिंबा देत पालिकेने भूखंड खरेदी करण्याचा निर्णय घेतला असून लवकरच या सिडको भूखंडाचा चतु:सीमा निश्चित करणार आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai