Breaking News
ऑनलाईन भरणा करण्यासाठी मोबाईल अॅपचे लोकार्पण
पनवेल : नवीन कर प्रणालीला विरोध होत असूनही पालिका मात्र मालमत्ता कर वसुल करण्याच्या निर्णयावर ठाम आहे. आता कर न भरणार्यांना दंडासहित म्हणजेच दरमहा 2 टक्के दराने करवसुलीला सुरुवात करण्याचे पालिका आयुक्तांनी मंगळवारी जाहीर केले. तसेच कर भरणा करण्यासाठी पीएमसी टॅक्स नावाने अॅप सुरू केले आहे. या अॅपच्या लोकार्पण सोहळ्यासाठी झालेल्या पत्रकार परिषदेत आयुक्त देशमुखांनी ही माहिती दिली.
पनवेल पालिका क्षेत्रात नागरिकांना विकास हवा असल्यास नागरिकांनी कर भरण्याच्या प्रक्रियेला सहकार्य करणे गरजेचे असल्याचे मत पालिका प्रशासनाकडून मांडले जात आहे. मात्र ग्रामपंचायतीच्या काळात भरावा लागणार्या कराच्या रकमेत तब्बल तीन पटीने वाढ झाल्याने मोठ्या प्रमाणात कर भरण्याला विरोध होत आहे. नागरिकांनी मालमत्ता कर भरु नये याबाबत शासनस्तरावर योग्य निर्णय होईल असे राजकारण्यांकडून सांगण्यात येते. मात्र अजून कोणताच निर्णय शासन स्तरावर झाला नाही. उलट पालिका प्रशासन घेत असलेल्या कठोर निर्णयामुळे नागरिकांच्या डोक्यावर करासहित दंडाचा बोजा पडण्याची भिती व्यक्त होत आहे. गेल्या दीड वर्षांपासून प्रयत्न करूनही पनवेल पालिका क्षेत्रातील सिडको वसाहतींमधील मालमत्ता धारकांपैकी अवघे 10 टक्के नागरिकांनी मालमत्ता कर जमा केला आहे. पाच टक्के सवलतीचा कालावधी अजून एक महिना असल्याने नागरिकांनी त्यांचा कर भरून पालिकेला सहकार्य करण्याचे आवाहन पालिकेचे उपायुक्त गणेश शेट्टे यांनी केले आहे. यापूर्वी पालिकेच्या वेबसाइटवरून थेट मालमत्ता कराचा भरणा करता येत होता. मात्र ही सेवा आता अॅपच्या माध्यमातून मोबाइलधारक मालमत्ताधारकांसाठी मंगळवारपासून सुरू करण्यात आली आहे. पनवेल पालिकेचे आयुक्त गणेश देशमुख यांनी नागरिकांना घरबसल्या मालमत्ता कर भरता यावा तसेच ऑनलाइन कर जमा केल्यावर त्याची पावती तातडीने नागरिकांना मोबाइलवर उपलब्ध व्हावी यासाठी पीएमसी टॅक्स नावाने अॅप सुरू केले आहे. पालिकेने तयार केलेले अॅप पीएमसी टॅक्स या नावाने असून हे अॅप प्लेस्टोरमधून मोबाइल वापरकर्ते डाऊनलोड करू शकतील. तसेच मोबाइलवरून मालमत्ताधारकांच्या नावातील किरकोळ बदल असल्यास त्यासाठीही अर्ज करू शकतील. मालमत्ता करावरुन पालिकेचे राजकीय वातावरण तापले असून सत्ताधारी अलिप्त राहिल्याचे पाहायला मिळाले.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai