Breaking News
पनवेल ः कर्नाळा नागरी सहकारी बँक घोटाळ्यासंदर्भात कलम 88 अन्वये चौकशी सुरू आहे. डीआयसीजीसीच्या माध्यमातून 384 कोटी रुपये रक्कम प्राप्त झाली आहे आणि त्या रकमेचे वाटप सुरू आहे. 14 मार्च 2022 पर्यंत 4205 ठेवीदारांना 86 कोटी रुपयांचे वाटप करण्यात आले आहे. विवेक पाटील, अभिजित पाटील यांच्या 70 मालमत्ता जप्त करून त्यांची विक्री केली जाईल आणि उर्वरित ठेवीदारांचे पैसे परत केले जाणार असल्याचे राज्याचे सहकारमंत्री बाळासाहेब पाटील यांनी विधानसभेत सांगितले.
17 फेब्रुवारी 2020 रोजी कर्नाळा बँक घोटाळाप्रकरणी गुन्हा दाखल झाला आहे. जवळपास 51,624 ठेवीदारांच्या 553.32 कोटी रुपयांच्या ठेवी बुडालेल्या आहेत. या सर्व ठेवीदारांना न्यायाची प्रतीक्षा आहे. या संदर्भामध्ये सुदैवाने केंद्र सरकारने एक लाखाचा विमा पाच लाख रुपये केला आणि त्याच्यामुळे ठेव विमा आणि पतहमी महामंडळ (डीआयसीजीसी) कायद्यान्वये ठेवीदारांना 386.51 कोटी रुपये मिळू शकणार आहेत. उर्वरित 170 कोटी रुपये डीआयसीजीसीकडून मिळणार नाहीत, तर ते जप्त केलेल्या मालमत्ता, बोगस कर्जदार यांच्या वसुलीमधून मिळू शकणार आहेत. या कर्नाळा बँक घोटाळ्याच्या संदर्भात आणि उर्वरित ठेवीदारांना त्यांचे पैसे परत मिळण्याच्या दृष्टिकोनातून आमदार प्रशांत ठाकूर, आमदार महेश बालदी, समीर कुणावार, मनीषा चौधरी, अमित साटम यांनी अर्थसंकल्पीय अधिवेशनात महाराष्ट्र विधानसभा नियम 105 अन्वये लक्षवेधी सूचना दाखल केली होती. या लक्षवेधीवर आमदार प्रशांत ठाकूर यांनी बोलताना सभागृहात पुन्हा आवाज उठविला.
राज्याचे सहकारमंत्री बाळासाहेब पाटील यांनी सांगितले की, कर्नाळा बँक घोटाळ्यासंदर्भात एकूण 20 दोषी व्यक्तींविरोधात 529 कोटी रुपयांचे दोषारोप बजावले आहे आणि संबंधित विवेक शंकर पाटील व अभिजित विवेक पाटील या दोघांच्या मालकीच्या 70 मालमत्तांवर अटॅचमेंट आणली आहे. चौकशी पूर्ण झाल्यानंतर ती मालमत्ता जप्त करून व त्याची विक्री करून ठेवीदारांच्या पैशाचा परतावा करण्यात येईल. तसेच डीआयसीजीसीच्या माध्यमातून 384 कोटी रुपये रक्कम प्राप्त झाली आहे आणि त्या रकमेचे वाटप सुरू आहे. 14 मार्च 2022पर्यंत 4205 ठेवीदारांना 86 कोटी रुपयांचे वाटप करण्यात आले आहे. उर्वरित रकमेच्या वाटपाचे काम सुरू आहे. बोगस कर्जदारांसंदर्भात कलम 88 कारवाईनुसार सर्व बाबी समोर येतील आणि त्यानुसार दोषींवर त्यांच्यावर कारवाई केली जाईल, असे सुतोवाच सहकारमंत्री यांनी या वेळी केले.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai