मराठी बांधकाम व्यावसायिकांचा महासंघ स्थापन

मराठी बांधकाम व्यावसायिकांचा महासंघ स्थापन

by Aajchi Navi Mumbai
Apr 04, 2022
513

8 एप्रिल, 2022 रोजी उद्घाटन

नवी मुंबई ः गुढीपाडव्याच्या पूर्वसंध्येला पुणे येथे महाराष्ट्रातील विविध मराठी बांधकाम व्यावसायिक संघटनांच्या प्रतिनिधींची 1 एप्रिल 2022 रोजी बैठक पार पडली व मराठी नववर्षाचे स्वागत करुन गुढीपाडव्यापासून मराठी बांधकाम व्यावसायिक महासंघ (नि.) स्थापन करण्याचे निश्चित करण्यात आले आहे. सर्व मराठी बांधकाम व्यावसायिकांची एक शिखर संघटना तयार करुन त्याद्वारे मोठ्या संख्येने सर्वसामान्यांना परवडतील अशी घरे उपलब्ध करुन देणे हा मुख्य उद्देश डोळयासमोर ठेवून मराठी बांधकाम व्यावसायिक महासंघाची स्थापना करण्यात येत आहे. महासंघाच्या उद्घाटनाचा कार्यक्रम शुक्रवार, 8 एप्रिल 2022 रोजी जे.डब्ल्यू. मेरीओट हॉटेल, पुणे येथे खासदार छत्रपती संभाजीराजे यांच्या हस्ते होणार आहे.

महाराष्ट्रातून विविध प्रतिनिधींची बैठक आयोजित करण्यात आली होती. या बैठकीत हावरे बिल्डरचे चेअरमन सुरेश हावरे, निर्माण ग्रुपचे चेअरमन अजित मराठे, बाविस्कर ग्रुपचे चेअरमन प्रकाश बाविस्कर, पुणे येथील मराठी बांधकाम व्यावसायिक असोसिएशनचे सुप्रसिध्द विकासक एस. आर. कुलकर्णी, अकुंश असंबे, गजेंद्र पवार, नितीन देशपांडे, प्रमोद पाटील, रविंद्र पाटे, श्रीनिवास बडवे, मिलिंद देशपांडे इ. उपस्थित होते. राज्य मराठी, सरकार मराठी, रहिवासी जास्तीत जास्त मराठी तर बांधकाम व्यावसायिक सुध्दा जास्तीत जास्त मराठी असले पाहिजे व मराठी तरुणांना या व्यवसायात येण्यासाठी प्रोत्साहन दिले पाहिजे व ग्राहकांच्या समस्या सामंजस्याने व सरकार दरबारी मांडून सहजगत्या सोडविल्या पाहिजे व ग्राहकांच्या बजेटमधील घरे उपलब्ध करुन देण्यासाठी सर्वांनी एकत्र आले पाहिजे, अशा प्रकारचा सूर बैठकीत उमटला व प्रत्येक जिल्हयात शहरात आणि नियोजन प्राधिकरण क्षेत्रात महासंघाचे कार्यालय आणि स्थानिक मराठी व्यावसायिक संघटनांना संलग्न करुन सामूहिकरीत्या प्रश्न सोडविण्याच्या उद्देशाने या महासंघाची स्थापना करण्यात आलेली आहे.

संघटनेचा मुख्य उद्देश
संपूर्ण महाराष्ट्रामधील मराठी बांधकाम व्यावसायिकांना एकत्रित आणून संघटित पाठबळ उभे करणे, बांधकाम क्षेत्रात येणार्‍या नवनवीन कायदेशीर व इतर बदलांची माहिती करून देणे, सभासदांचे व्यावसायिक मनोबल वाढविणे, तसेच महासंघाद्वारे सामाजिक प्रगती साधणे, ग्राहकांचे प्रश्न सोडविणे, ग्राहक व विकासक यांच्या वादामध्ये समेट घडवून आणणे, सर्व सामान्यांना परवडतील अशा किंमतीमध्ये अधिकाधिक प्रमाणात महाराष्ट्रामध्ये घरे उपलब्ध करुन देणे परवडतील अश्या घरांच्या उपलब्धतेकरीता सरकार दप्तरी योग्य सूचना करणे, परवडणाच्या घराच्या निर्मितीसाठी बांधकामाचा खर्च आटोक्यात राहावा यादृष्टीने एकत्रितपणे बांधकाम साहित्याची खरेदी करणे, परवडणार्‍या घराच्या निर्मितीसाठी मराठी बांधकाम व्यावसायिकांचे योग्य प्रशिक्षण करणे, प्रकल्प वेगाने पूर्ण व्हावेत या दृष्टीकोनातून मराठी बांधकाम व्यावसायिकांना विविध संस्थाच्या माध्यमातून आर्थिक सहाय्य उपलब्ध करुन देणे