धोकादायक सरंक्षण भिंतींचा प्रश्न ऐरणीवर
- by Aajchi Navi Mumbai
- Apr 09, 2022
- 282
दुरूस्ती करण्याची नागरिकांची मागणी
नवी मुंबई : शहर सुशोभिकरणासाठी पालिकेने कंबर कसली असून लाखो रुपये खर्च केले आहेत. मात्र शहरातील रस्त्यालगत असणार्या काही संस्था, शाळा, सोसायटींच्या धोकादायक भिंतींकडे दुर्लक्ष केले आहे. भिंतीची दुरुस्ती करण्याऐवजी त्यांची रंगरगोंटी करण्यावर भर दिला आहे. त्यामुळे या असुरक्षित भिंतीमुळे पदपथावरून चालणार्या पादचार्यास अपघात होण्याची शक्यता निर्माण झाली आहे.
स्वच्छता अभियानाअंतर्गत महापालिकेने विविध उपक्रम हाती घेतले आहेत. जागोजागी फ्लेमिंगोच्या प्रतिकृती, कारंजे, विविध पुतळे उभारले आहेत. शहरातील रस्त्याला लागून असणार्या भिंती, रेल्वेलाईन लगतच्या भिंतीवर रंगरंगोटी करुन सामाजिक, पर्यावरण संबंधित संदेश लिहिले जात आहेत. भित्तीचित्रे, कविता, महाराष्ट्राची संस्कृती रेखाटून जनजागृती केली जात आहे. मात्र या भिंती सुरक्षित आहेत की नाही याची पडताळणी केली जात नाही. धोकादायक असणार्या भिंतींवरही रंगाची उधळण करुन त्यांच्या दुरुस्तीकडे दुर्लक्ष केले जात आहे. या भिंतींच्या दुरूस्तीबाबत कोणतेही पाऊल उचलले जात नसल्याने नागरिकांमध्ये नाराजी आहे. सार्वजनिक व रहदारीच्या ठिकाणच्या भिंतीही असुरक्षित झाल्याने पादचार्यांच्या जिवाला धोका निर्माण झाला आहे. धोकादायक भिंतींना रंगाचा मुलामा देऊन त्या सुरक्षित होणार नाहीत तर त्यांची पुनर्बांधणीची गरज असल्याचे रहिवाशांचे म्हणणे आहे. त्यामुळे धोकादायक इमारतींच्या कारवाई बाबत तत्पर असणार्या महानगरपालिकेच्या अधिकार्यांचे तसेच संबंधितांचे या धोकादायक संरक्षण भिंतीकडे कधी लक्ष जाणार असा प्रश्न सामान्य नागरिकांकडून उपस्थित होत आहे. तसेच ज्या सोसायटी व संस्थांच्या भिंती धोकादायक झाल्या आहेत त्या संस्थांना पालिकेने भिंतीच्या दुरुस्तीसाठी योग्य कार्यवाही करण्याचे आदेश द्यावेत यावे असेही नागरिकांनी प्रतिक्रिया देताना व्यक्त केले.
- शाळेची धोकादायक संरक्षण भिंत
वाशीतील आयसीएल स्कूलच्या इमारतीच्या पूर्वेकडील मुख्य रस्त्याला लागून असलेली शाळेची संरक्षण भिंत एका बाजूस झुकलेली आहे. ही भिंत रंगरंगोटी करून आकर्षक केली असली तरी येथून जाणार्या पादचार्यांचा तसेच विद्यार्थ्यांच्या सुरक्षेचा प्रश्न मात्र गंभीर झाला आहे. याबाबत विचारणा केली असता कोविड महामारीमुळे दुरूस्तीच्या कामास उशिर झाला असून लवकरच या भिंतींची दुरूस्ती करणार आहोत. तसेच दुर्घटना होऊ नये याची योग्य ती काळजी शाळा व्यवस्थापन घेत असल्याचे शाळेच्या संचालिका राव यांनी सांगितले.
पालिका भिंती सुशोभिकरणासाठी प्रयत्नशील आहे. मात्र सोसायटी किंवा संस्थेच्या इमारतींच्या संरक्षण भिंतीची देखभाल ही त्या सोसायटी किंवा संस्थेची जबाबदारी असते. याविषयी अधिक माहिंती घेवून कार्यवाही करण्यात येईल. - अमरीश पटनिगीरे, उपायुक्त, परिमंडळ 2, मुख्यालय
संबंधित पोस्ट
सब्सक्राइब करा न्यूज़लेटर
SUBSCRIBE US TO GET NEWS IN MAILBOX
फोटो गैलरी
वीडियो गैलरी
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai