Breaking News
पनवेल ः आर. झुनझुनवाला संकारा आय हॉस्पिटलने आपले यशस्वी एक वर्षपूर्ण केले असून या वर्षाभरामध्ये नेत्र चिकित्सा सेवांसह यशस्वीरित्या मोफत 3000 शस्त्रक्रिया आणि 18,903 बाह्य रूग्ण तपासण्या करण्यात आल्या आहेत. प्रथम वर्धापना निमित्त, येत्या आर्थिक वर्षामध्ये रूग्णालयाद्वारे 6500 मोफत नेत्र शस्त्रक्रिया केल्या जाणार आहेत.
गेल्या वर्षभरामध्ये, डॉक्टर आणि तज्ञ पिडियॅट्रिक ऑपथॅलमोलॉजिस्ट, कॉर्निया ऑपथॅलमोलॉजिस्ट, कॅटरॅक्ट ऑपथॅलमोलॉजिस्ट, रेटिना ऑपथॅलमोलॉजिस्ट, ग्लॉकोमा तज्ञ, ऑक्युलोप्लास्टी तज्ञ आणि विविध विभागातील डॉक्टर्सद्वारे रूग्णालयात यशस्वीरित्या वेगवेगळ्या प्रकारच्या नेत्रशल्यचिकित्सा करण्यात आल्या आहेत आणि रूग्णांना दृष्टी देण्यास मदत मिळाली आहे. कार्यक्रमाला पनवेलचे आमदार प्रशांत ठाकूर आणि स्थानिक नगरसेवक संतोष शेट्टी, रूग्णालयाचे प्रमुख वैद्यकिय अधिकारी डॉ. गिरीश बुधरानी, रूग्णलयाचे विभाग प्रमुख डॉ. राजेश कापसे आणि सार्वजनिक नेत्र आरोग्य व्यवस्थापक- सचिन भूमकर देखील उपस्थित होते. तसेच डोळे तपासणी आणि डॉक्टरांच्या चिकित्सा शिबिराचे देखील आयोजन करण्यात आले होते, ज्यामुळे उपचाराची आवश्यकता असल्यास रूग्णांना योग्य ती पाऊले उचलता येतील.
रूग्णालयाच्या कामाची प्रशंसा करताना ठाकूर म्हणाले, आपल्या क्षेत्रातील रूग्णांच्या अधिकाधिक मोतीबिंदू शस्त्रक्रिया करण्याची विनंती मी डॉक्टरांना करतो ज्यामुळे अशा प्रकारच्या रूग्णांना अशा सेवांचा जास्तीत जास्त लाभ घेता येऊ शकेल. रूग्णालयाचे विभाग प्रमुख डॉ. राजेश कापसे यावेळी बोलताना म्हणाले, आम्हाला आमचे कार्य अधिकाधिक पुढे न्यायचे असून अंधत्व-मुक्त जगाच्या निर्मीतीच्या दृष्टीकोनातून काम करण्याचा आमचा मानस आहे. आम्ही 80 आणि 20 टक्के या तत्वांवर योजना राबवितो ज्यामुळे 20 टक्के लोकांद्वारे नेत्र उपचाराकरिता खर्च केला जातो आणि मिळालेल्या त्या निधीमधून आम्ही उरलेल्या रूग्णांकरिता सबसिडी तत्वावर उपचार देतो. आम्हाला गरीब आणि गरजू लोकांना कमी किमतीमध्ये उच्च गुणवत्ता असलेली नेत्र सेवा मिळावी असे वाटते.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai