किनारी सुरक्षा जागरूकतेसाठी नियोजन

किनारी सुरक्षा जागरूकतेसाठी नियोजन

by Aajchi Navi Mumbai
Aug 06, 2022
433

उरण ः भारतीय नौदलाच्या पथकाकडून प्रत्येक जिल्हाच्या अंतर्गत असलेल्या विविध मासेमारी गावांमध्ये सागरी / खाड़ी किनारी भागातील गावांमध्ये सागरी पोलीस ठाणे किनारी भागात सुरक्षा जागरूकता आणि डेटा संकलन मोहिम राबविण्यात येणार आहे. त्या अनुषंगाने पोलीस आयुक्त, नवी मुंबई बिपिनकुमार सिंग व पोलीस सह आयुक्त, नवी मुंबई डॉ. जय जाधव यांचे सुचनेनुसार व पोलीस उप आयुक्त विशेष शाखा नवी मुंबई रूपाली अंबुरे यांचे मार्गदर्शनाप्रमाणे सागरी पोलीस ठाणे किनारी भागात सुरक्षा जागरूकता आणि डेटा संकलन मोहिम 04 ऑगस्ट 2022 रोजी उरण सागरी पोलीस ठाणे हद्दीत मच्छिमार सोसायटी करंजा येथे पार पडली. भारतीय नौदलाचे पथकातर्फे समुदाय संपर्क अभियाना अंतर्गत मासेमारी बांधव, सागर रक्षक दल व ग्राम रक्षक दल सदस्य यांचेकरिता सागरी सुरक्षा जागरूकता आणि डेटा सकंलन करणे तसेच सागरी सुरक्षितेच्या दृष्टीने सतर्कता आणण्याकरिता भारतीय नौदलाचे लेफ्टनंट कमांडर डेविड सिंह, कोस्ट गार्ड प्रधान अधिकारी, पी. एम. सतदेव, ओएनजीसीचे सुरक्षा निरीक्षक अधिकारी स्वनिल आर. ठाकुर व सुनिल कुमार असे पथक आले होते.

सदर अभियानामध्ये सागरी सुरक्षा संदर्भात व सागरी सुरक्षा अधिक बळकट करण्याच्या दृष्टीने भारतीय नौदलाचे पथकांकडून उपस्थित मासेमारी सोसायटी अध्यक्ष, मच्छिमार बांधव, सागर रक्षक दल व ग्राम रक्षक दल सदस्य यांना सांगितले की मासेमारी बांधव यांनी मासेमारीकरिता खोल समुद्रात मासेमारीकरिता जाताना सतर्क देवाण-घेवाण करणेकरिता व्ही. एच. एफ वायरलेस सेट, मोबाईल फोन सोबत घेवुन जाणे. बोटींमध्ये सुरक्षेकरिता जीव रक्षक साधन सामुग्री जवळ बाळगणे व मासेमारी करिता जे मार्ग देण्यात आलेले आहेत त्याच मार्गाचा वापर करण्यात यावा. तसेच मासेमारी करित असताना नियमितपणे बोटींची मुळ कागदपत्रे व बोटीवर असलेल्या प्रत्येकाकडे फोटो आयडी कार्ड जवळ बाळगणे, समुद्रात कोणत्याही प्रकारची अनोळखी बोट आढळुन आल्यास तात्काळ संपर्क करणे याबाबत सागरी सुरक्षितेच्या अनुषंगाने योग्य ते मार्गदर्शन करून सुचना देऊन त्यांना सागरी सुरक्षा संदर्भात महत्व पटवून दिले.

तसेच सदर अभियानामध्ये सागरी सुरक्षा संदर्भातील सागरी / खाडी किनारी भागात मिळुन आलेल्या संशयित वस्तु, नौका व इसम यांची तात्काळ माहिती नजीकच्या पोलीस ठाण्यास देणार्‍या मच्छिमार बांधव 1) दिपक नाथ म्हात्रे, रा. वशेणी, ता. उरण 2) संतोष कडु, रा. नागाव, ता. उरण, 3) जीवनदास जगन्नाथ कोळी रा. करंजा, ता. उरण, नवी मुंबई यांचा उत्कृष्ट कामागिरी केलेबाबत भारतीय नौदलाचे लेफ्टनंट कमांडर डेविड सिंह यांचे हस्ते सत्कार करण्यात आला. तसेच नवी मुंबई पोलीस आयुक्तालयातर्फे सागरी सुरक्षेसंदर्भात सुरू करण्यात आलेल्या कोस्टल हेल्पलाईन क्रमांक 1093 ची उपस्थितांना माहिती दिली व सदर हेल्पलाईनचा वापर करण्याबाबत आवाहन केले.