Breaking News
उरण ः उरण, पनवेल, पेण व अलिबाग तालुक्यातील गावातील गेल इंडिया लिमिटेड या भारत सरकारच्या उपक्रमातून पेट्रोलियम व खनिज पाईपलाईन जात असल्याने संबंधित कंपनीने शेतकर्यांना नोटीसा पाठविल्या आहेत. मात्र या पाईपलाईनमुळे शेती नष्ट होणार असून भविष्यातही सदर जमिनी नापिक होणार असल्याने असून या उपक्रमाला शेतकर्यांनी विरोध केला आहे. सदर प्रकल्पास कळंबुसरे शेतकर्यांनी 9 ऑक्टोबर रोजी जुई वाडा येथे संघटित होऊन विरोध दर्शविला.
कायदा 1962 मधील तरतुदीनुसार संबंधित गावातील शेतकर्यांच्या जमिनीमधून पाईपलाईन जात आहे. सदर कायद्यातील कलम 3 पीट कलम 1 मधील तरतुदीनुसार बाधित शेतकर्यांना नोटीसा बजावण्यात येत आहेत. शेतजमीनीतुन पाईपलाईन टाकल्यास आजुबाजूचे क्षेत्र देखील लागवडीयोग्य राहणार नाही. भविष्यात शेतकर्यांवर उपासमारीची वेळ येणार आहे म्हणुन सदर प्रकल्पास कळंबुसरे शेतकर्यांनी विरोध दर्शविला आहे. शेतकर्यांच्या म्हणण्यानुसार सदर मिळकतीतून देखील कंपनीने प्रोपेन वाहून नेणारी पाईपलाईन टाकल्यास आम्हास पिक घेणे अशक्य होऊन आमचे उपजिविकेचे साधनच नष्ट होणार आहे. त्याशिवाय भविष्यात सदर मिळकतीत आम्हास कोणताही इतर व्यवसाय, उपक्रम करता येणार नाही. त्याचप्रमाणे सदरच्या मिळकती हया इतर कोणत्याही प्रकल्पाकरीता संपादीत करणे शक्य होणार नाही. सदर मिळकतीतून आम्हास होणारे फायदे गेल कंपनीकडून अस्तित्वात येण्यापूर्वीच नाहीसे होतील. त्यामुळे सदर मिळकतीतून गेल कंपनीने प्रोपेन पाईपलाईन टाकल्यास सदरच्या मिळकती हया नापिक होऊन शेतकर्यांचे उपजिविकेचे साधन गेल कंपनीकडून नष्ट होत असल्याने भविष्यात आमचेवर वायुगळती सारखे प्रकार झाल्यास आमच्या जीवीताला धोका निर्माण होणार आहे. याअगोदरही लगतचे क्षेत्रामधुन एल पी जी पाईपलाईन गेलेली असल्याने त्यामध्ये बरेच क्षेत्र संपादीत झालेले आहे. सदर संपादीत क्षेत्राची नुकसान भरपाई प्रकल्पग्रस्त शेतकर्यांना अदयापही मिळालेली नाही. त्यामुळे गेल कंपनीच्या माध्यमातून होवु घातलेल्या प्रकल्पास आमचा सक्त विरोध आहे असे उपस्थित शेतकर्यांनी सांगितले. यावेळी कृष्णा तांडेल, राजेश पाटील, सुनिल केणी, रत्नाकर राऊत, विशाल पाटील, ज्ञानेश्वर पाटील, सुरेश भेंडे, रुपेश पाटील यांच्यासह बाधित शेतकरी उपस्थित होते. पुढील रूपरेषा ठरविण्यासाठी लवकरच एका बैठकीचे आयोजन करण्यात येणार आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai