Breaking News
2400 टनाच्या डेकची यशस्वी उभारणी
मुंबई : मुंबई पारबंदर प्रकल्पातील (शिवडी-न्हावाशेवा सागरी सेतू) सर्वात मोठ्या, तब्बल 2400 मेट्रिक टन वजनाच्या ऑर्थोट्रॉपिक स्टील डेकची एमएमआरडीएकडून यशस्वीपणे उभारणी करण्यात आली आहे. हा डेक 5-6 बोइंग विमानाइतका जड आहे. इतक्या जड ऑर्थोट्रॉपिक स्टील डेकच्या उभारणीचे आव्हान पूर्ण करून एमएमआरडीएने प्रकल्प पूर्णत्वाच्या दिशेने आणखी एक पाऊल टाकले आहे.
मुंबई ते नवी मुंबई प्रवास सुकर आणि वेगवान करण्यासाठी एमएमआरडीएकडून 21.80 किमीच्या शिवडी-न्हावाशेवा सागरी सेतू बांधण्यात येत आहे. सागरी सेतू अत्यंत मजबूत करण्यासाठी तसेच काम वेगाने पूर्ण व्हावे यासाठी एमएमआरडीएने प्रकल्पात अत्याधुनिक अशा ऑर्थोट्रोपिक स्टील डेक तंत्रज्ञानाचा वापर सुरू केला आहे. या परदेशी तंत्रज्ञानाचा भारतात पहिल्यांदाच मुंबई पारबंदर प्रकल्पात वापर केला जात आहे. त्यानुसार 3 जानेवारीला पहिला ओएसडी डेक टप्पा 2 मध्ये बसविण्यात आला. त्यानंतर 14 जानेवारीला 10.37 किमीच्या टप्पा 2 मध्ये दुसरा आणि 8 फेब्रुवारीला दोन ओएसडी डेक एकत्रित बसविण्यात आले. मेपर्यंत सहा ऑर्थोट्रोपिक स्टील डेकची उभारणी करण्यात आली. आता ऑक्टोबरअखेरीस 14 ऑर्थोट्रॉपिक स्टील डेक उभारण्यात आले आहेत. प्रकल्पात एकूण 38 ऑर्थोट्रॉपिक स्टील डेक बसविण्यात येणार आहेत.
सोमवारी 14 वा सर्वात जड डेक पॅकेज 1 मध्ये बसविण्यात आला. दरम्यान आतापर्यंत पारबंदर प्रकल्पाचे काम वेगात सुरू असून डिसेंबर 2023 मध्ये पूर्ण होणार आहे. हा सेतू वाहतूक सेवेत दाखल झाल्यास नवी मुंबई ते मुंबई अंतर काही मिनिटांत पार करता येणार आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai