Breaking News
मागण्या मान्य न झाल्यास शासनाला इशारा
उरण : शासनाच्या मच्छिमार विरोधी निर्णयामुळे पर्ससीन पध्दतीने मासेमारी करणार्या व त्यावर उदरनिर्वाह करणार्या लाखो कुटूंबियांच्या मागण्यासाठी प्रसंगी शासनाविरोधात आंदोलन छेडण्याचा इशारा मच्छीमारांनी करंजा येथे झालेल्या बैठकीत दिला आहे. बैठकीला मुंबई, मोरा, करंजा, दिघोडे, रेवस, ट्रॉम्बे, माहुर,ठाणे येथील विविध मच्छिमार संस्थांचे सुमारे 550 पदाधिकारी व मच्छीमार प्रतिनिधी उपस्थित होते.
120 अश्वशक्ती इंजिनवरील मच्छीमार नौकांना डिझेल कोट्याच्या प्रस्तावातून वगळण्याचा निर्णय रद्द करुन डिझेल कोटा पुर्ववत सुरू करणे, मच्छीमारांना कोट्यावधींची थकित असलेल्या डिझेल परताव्याची रक्कम अदा करण्यात यावी,मासळीला योग्य भाव मिळावा, निर्यातदार,लिलावदार व व्यापार्यांकडून मच्छीमारांची होणारी लुबाडणूक थांबविण्यात यावी यासाठी आंदोलनाची रणनीती ठरविण्यासाठी करंजा येथील द्रोणागिरी देवी मंदिराच्या सभामंडपात तातडीने बैठक बोलावण्यात आली होती. मुंबई पर्ससीन वेल्फेअर असोसिएशनचे अध्यक्ष गणेश नाखवा, करंजा मच्छीमार सहकारी संस्थेचे संचालक रमेश नाखवा, अखिल महाराष्ट्र मच्छीमार कष्टकरी खलाशी महासंघाचे अध्यक्ष सिताराम पटेकर यांच्या अध्यक्षतेखाली आयोजित करण्यात आलेल्या या बैठकीसाठी विविध मच्छीमार सहकारी संस्थेचे सुमारे 550 पदाधिकारी, प्रतिनिधी या बैठकीत सहभागी झाले होते.
पर्ससीन नेट मासेमारी करणार्या राज्यातील केवळ 180 मच्छीमार नौकांनाच परवानगी देण्यात आली आहे. मात्र राज्यभरात हजारो पर्ससीन पध्दतीने मासेमारी करणार्या हजारांहून अधिक मच्छीमार बोटी आहेत. या मच्छीमार व्यवसायावर हजारो कुटुंब उदरनिर्वाह करीत आहेत. या बैठकीतच पर्ससीन नेट पध्दतीने मासेमारी करणार्या मच्छीमारांच्या अनेक मागण्या व भेडसावणार्या समस्यांवर जोरदार चर्चा करण्यात आली. शासन, व्यापार्यांनी मागण्यांबाबत मच्छीमारांच्या हिताची भुमिका घेऊन सहकार्य न केल्यास न्याय हक्कासाठी आणि विविध मागण्या प्रसंगी शासनाविरोधात आंदोलन छेडण्याचाही निर्णय मच्छीमारांनी करंजा येथील बैठकीत घेण्यात आला आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai