Breaking News
थकीत डिझेल परतावा देखील मिळणार
नवी मुंबई : मच्छीमारांच्या मासेमारी नौकांसाठी लागणार्या डिझेलच्या कोट्यासंदर्भातील नियमात राज्य सरकारकडून सुधारणा करण्यात आली आहे. या सुधारणेनुसार यापुढे 120 अश्वशक्ती व त्यापेक्षा जास्त क्षमतेची इंजिन असणार्या मासेमारी नौकांनाही नियमित कोट्यानुसार डिझेल मिळणार आहे. यामुळे कोकण किनारपट्टीवरील मच्छीमारांमध्ये आनंदाचे वातावरण आहे.
प्रधान महालेखापालांनी आक्षेप घेतल्यामुळे मार्च महिन्यापासून 120 अश्वशक्ती क्षमतेचे इंजिन असलेल्या मासेमारी नौकांना देण्यात येणारा डिझेल कोटा व परतावा रोखण्यात आला होता. मात्र राज्य सरकारने कायद्यात सुधारणा करून सरसकट सर्वच मासेमारी नौकांना कोटा देण्याचा निर्णय घेतला आहे. या निर्णयामुळे मच्छीमारांना डिझेलचा कोटा लागू होणार आहेच शिवाय अनेक दिवसांपासून थकीत असलेला डिझेलचा परतावा देखील मिळणार आहे.
मच्छीमारांना डिझेल कोटा मंजूर करण्यासाठी राज्य सरकारने 1997 व त्यानंतर 2008 असे दोन वेळा आदेश काढले आहेत. 1997 च्या आदेशांनुसार 1 ते 6 सिलिंडर असलेल्या व कमाल हायस्पीड मर्यादा 120 अश्वशक्ती असणार्या मासेमारी नौकांना डिझेलचा कोटा देण्यात येणार असल्याचे नमूद केले. त्यानंतर 2008 मध्ये पुन्हा परिपत्रक काढून राज्य सरकारने मासेमारी नौकांची 120 अश्वशक्ती ही कमाल हायस्पीड मर्यादा काढून टाकली आणि 1 ते 6 सिलिंडर असलेल्या सर्वच मासेमारी नौकांना डिझेल कोटा व डिझेल परतावा देण्याबाबत आदेश दिले. त्यानुसार आतापर्यंत मच्छीमारांना डिझेलचा कोटा व परतावा देण्यात येत होता. मार्च महिन्यात प्रधान लेखापालांनी या डिझेलच्या कोट्यावर आक्षेप घेऊन डिझेलचा कोटा बंद केला. हा कोटा बंद करताना 2008 च्या सुधारित परिपत्रकाची दखल न घेता केवळ 1997 च्या राज्य सरकारचा निर्णयच महालेखापालांनी गृहित धरला. परिणामी यावर्षी मार्च महिन्यापासून 120 अश्वशक्तीपेक्षा जास्त क्षमता असलेल्या नौकांचा डिझेल कोटा बंद होऊन त्यांना डिझेल खासगी डिझेल पंपावरून बाजारभावाने घ्यावे लागत होते. यात मच्छीमारांना मोठा आर्थिक फटका बसत होता.
राज्य सरकारने कायद्यात सुधारणा करणारे शुद्धीपत्रक 14 नोव्हेंबरला प्रसिद्ध केल्यामुळे यापुढे सर्वच मासेमारी नौकांना कोट्यानुसार डिझेल मिळणार असून थकीत असलेला डिझेल परतावा देखील मिळणार आहे. ही सुधारणा 2008 पासून लागू झाली आहे. त्यामुळे कोकण किनारपट्टीवरील हजारो मच्छीमारांना त्याचा फायदा होणार आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai