Breaking News
मालमत्ता अहवाल विभाग अधिकार्यांना सादर
नवी मुंबई ः नवी मुंबई महापालिका क्षेत्रातील बहुचर्चित लिडार सर्वेक्षण अंतिम टप्प्यात असून बहुतांश मालमत्तांचे सर्वेक्षण पार पडले आहे. हा अहवाल पालिकेने संबंधित विभाग अधिकार्यांना तपासणीसाठी दिला आहे. काही मालमत्तांचा सर्व्हे अपुर्ण असून तो डिसेंबर अखेरपर्यंत पुर्ण करण्याचे आदेश संबंधित ठेकेदाराला पालिकेने दिले आहेत. या सर्वेक्षणातून पालिकेला किती कोटींच्या उत्पन्नात वाढ होते हे पाहणे औत्सुक्याचे ठरणार आहे.
नवी मुंबई महापालिकेतील सर्व अधिकृत व अनधिकृत बांधकामांचे, मालमत्तांचे सर्वेक्षण लिडार तंत्रज्ञानाद्वारे करण्यात येत आहे. त्यामध्ये सदनिकाधारक वापरत असलेल्या अधिकृत क्षेत्रफळानुसार मालमत्ता कर आकारणी होणार आहे. या सर्वेक्षणाचा वापर महापालिकेला रस्त्यांचे, मलनिस्सारण व जलवाहिन्यांचे अचुक आराखडे बनविण्यास होणार आहे. या सर्वेक्षणास यापुर्वी सत्ताधार्यांनी विरोध केला होता. परंतु, तत्कालीन पालिका आयुक्त एन.रामास्वामी यांच्या पाठपुराव्यामुळे पालिकेने फेटाळलेला प्रस्ताव शासनाने मंजुर केला.
लिडार तंत्रज्ञानाद्वारे नवी मुंबईतील जवळजवळ 90 टक्के मालमत्तांचे सर्वेक्षण पुर्ण झाले आहे. या सर्वेक्षणात मालमत्ता कर आकारणीतून सुटलेल्या किंवा चुकीच्या नोंदी असलेल्या अनेक मालमत्तांचा शोध पालिकेला लागला आहे. या सर्वेक्षणाचा अहवाल महापालिकेने पुर्नतपासणीसाठी संबंधित विभाग अधिकार्यांना पाठवला आहे. विभाग अधिकार्यांनी संबंधित अहवालाची तपासणी केल्यानंतर अहवालात दर्शवलेल्या क्षेत्रफळाप्रमाणे मालमत्ता कर आकारणी करण्यात येणार आहे. पालिकेला या मालमत्ता कर आकारणीतून 200 कोटी रुपयांचे अतिरिक्त महसुल प्राप्त होईल अशी अपेक्षा आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai