Breaking News
बोकडविरा वायू विद्युत निर्मिती दुर्घटना प्रकरण
उरण ः उरण तालुक्यातील बोकडविरा येथील वायू विद्युत निर्मिती केंद्रात 9 ऑक्टोबर 2022 रोजी झालेल्या बॉयलरच्या भीषण स्फोटात तीन कामगारांचा मृत्यू झाला. या कामगारांच्या कुटुंबियांना भरपाई देण्यास प्रशासन टाळाटाळ करत होते. मात्र जिल्हा परिषद सदस्य विजय भोईर यांनी केलेल्या पाठपुराव्यामुळे मयत विष्णू पाटील यांच्या कुटुंबियांना न्याय मिळाला आहे. शासनाकडुन पाटील कुटुंबियांना पेन्शन व इतर सुविधा मंजूर झाल्या आहेत.
बोकडविरा येथील वायू विद्युत निर्मिती केंद्रात झालेल्या भिषण स्फोटात तीन कामगार 80 ते 85 टक्के भाजले होते. त्यातील विवेक धुमाळे याचा हायप्रेशरच्या वाफेच्या होरपळून जागीच मृत्य झाला. बोकडविरा येथील दुसरा कामगार विष्णू पाटील हा नवी मुंबई येथील रुग्णालयात उपचार घेत असताना मरण पावला. तर डोंगरी येथील रहिवासी असलेला तिसरा कामगार कुंदन पाटील अत्यवस्थ असल्याने मृत्यूशी झुंज देत असताना तिसर्या दिवशी त्याची प्राणज्योत मालवली. या वायू विद्युत केंद्राच्या दुर्घटनेतील एका सहाय्यक अभियंत्यासह तीन कामगारांना त्यांचा काहीही दोष नसतांना जीवाला मुकावे लागले होते. व्यवस्थापणाने मूत कामगारांच्या वारसांच्या भविष्यासाठी त्यांचा न्याय हक्क त्यांना मिळावा या मागणीसाठी प्रयत्न केले. मात्र निर्धास्त असलेल्या प्रशासन अधिकार्यांनी मृत कामगारांच्या डोळ्यातील अश्रू पुसण्या ऐवजी सरकारी नियमांचे पाढे वाचण्याशिवाय विशेष काही मदत देण्यावर भर दिला नाही. प्रकल्पातील दुर्घटना ही कंपनी प्रशासनाच्या हलगर्जीपणातून झाली असल्याचे स्पष्ट झाले होते. मात्र जिल्हा परिषद सदस्य विजय भोईर यांनी बोकडवीरा येथील मयत कामगार विष्णू पाटील यांना न्याय मिळवून देण्यासाठी सुरवातीपासूनच पाठपुरावा सुरु ठेवला होता. विजय भोईर यांच्या प्रयत्नांना यश आले असून मयत विष्णू पाटील यांच्या कुटुंबियांना न्याय मिळाला आहे. शासनाकडुन पाटील कुटुंबियांना पेन्शन व इतर सुविधा मिळाल्या आहेत. तसे आदेश सुद्धा प्रशासन कडुन देण्यात आलेले आहेत. ईएसआय विभागाकडून मयत विष्णु पाटील यांच्या कुटुंबाला रु. 10322 प्रति महिना पेन्शन मंजूर झाली आहे. सदर पेन्शन त्यांच्या पत्नीला पुढील संपूर्ण आयुष्यभरासाठी मिळणार आहे. तसेच त्यांचे भविष्य निर्वाह निधीचे पैसे आणि भविष्य निर्वाह निधीचा विम्याचे पैसे मिळवण्यासाठी पुढील पाठपुरावा करणार असल्याचे आश्वासन विजय भोईर यांनी दिले आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai