Breaking News
उरण ः रायगडचे जिल्हाधिकारी डॉ. महेंद्र कल्याणकर यांच्या संकल्पनेतून जिल्ह्यातील प्रत्येक तालुक्यात, खेडोपाडी ‘गरुडझेप’ ही संकल्पना राबविली जात आहे. या गरुडझेप स्पर्धा उपक्रमातून रायगड जिल्ह्यातील प्रत्येक तालुक्यात तसेच ग्रामीण भागातही गरुडझेप स्पर्धा परिक्षा अभ्यासिका विदयार्थ्यांसाठी उपलब्ध करून देण्यात येत आहे.
डॉ. महेंद्र कल्याणकर यांनी स्पर्धा परिक्षेबाबत जनजागृती व्हावी या अनुषंगाने गरुडझेप उपक्रमाची सुरुवात केली. या उपक्रमाला स्पर्धा परिक्षेच्या विदयार्थ्यांचा उत्तम प्रतिसाद मिळत आहे. उरणचे तहसिलदार भाऊसाहेब अंधारे यांच्या मार्गदर्शनाखाली उरण नगर परिषदेच्या माँसाहेब मीनाताई ठाकरे सार्वजनिक ग्रंथालयात गरुड झेप स्पर्धा परिक्षा अभ्यासिका सुरु करण्यात आली होती. या वाचनालयात दररोज अनेक विद्यार्थी येत असतात. परंतु, वाचनालय ठराविक वेळेत सुरु असल्याने स्पर्धा परिक्षेच्या विदयार्थ्यांना पूर्ण वेळ एकाच ठिकाणी बसून अभ्यास करता येत नव्हता. विद्यार्थ्यांची ही अडचण दूर करण्यासाठी वाचनालय दर रविवारी सकाळी 8 ते रात्री 10 वाजेपर्यंत पूर्णवेळ चालू ठेवण्याचा निर्णय वाचनालयाचे ग्रंथपाल संतोष पवार यांनी उरण नगरपरिषदेचे मुख्याधिकारी राहुल इंगळे यांच्या मान्यतेने घेतला.
स्पर्धा परिक्षा तसेच विविध पदासाठी असलेल्या स्पर्धा परिक्षेचे पुस्तके वाचनालयात उपलब्ध असून विदयार्थ्यांना ते पुस्तके मोफत वाचायला मिळणार आहे. त्यामूळे जास्तीत जास्त विद्यार्थ्यांनी या योजनेचा लाभ घ्यावा असे आवाहन संतोष पवार यांनी केले आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai