Breaking News
आयुक्तांचे एनएमएमटीला निर्देश
नवी मुंबई ः महानगरपालिका परिवहन उपक्रमार्फत दररोज 2.5 लाखाहून अधिक नागरिकांना प्रवाशी सेवा पुरवित असून ती प्रवाशांच्या दृष्टीने अधिक सुविधाजनक व्हावी याकरिता सकारात्मक उपाययोजना कराव्यात तसेच कोणताही परिवहन उपक्रमाचे साध्य हे नफा कमाविणे नसले तरीही होणारा तोटा कमीत कमी करण्याच्या दृष्टीने आवश्यक उपाययोजना कराव्यात असे निर्देश महापालिका आयुक्त राजेश नार्वेकर यांनी नमुंमपा परिवहन उपक्रमाच्या मुख्यालय भेटीप्रसंगी दिले.
बेलापूर भवन येथील एनएमएमटी मुख्यालयातील कार्यपध्दतीची तसेच आयटीएमएस अर्थात इंटिग्रेटेड ट्रान्सपोर्ट मॅनेजमेंट सिस्टीमची आयुक्तांनी बारकाईने पाहणी केली. याप्रसंगी परिवहन व्यवस्थापक योगेश कडुसकर आणि इतर अधिकारी उपस्थित होते. सद्यस्थितीत एनएमएमटीच्या 567 बसेस 76 बस मार्गांवर कार्यरत असून तुर्भे, आसुडगांव व घणसोली येथील 3 आगारांमधून या बसेसचे दैनंदिन परिचलन होते. या परिचलनामध्ये कोणत्या आगारातून दैनंदिन किती बसेसचे परिचलन होते, त्यामध्ये स्वत:च्या बसेस तसेच जीसीसी तत्वावरील बसेस किती, त्याचप्रमाणे सर्वसाधारण बसेस, सीएनजी बसेस, व्होल्वो बसेस, इलेक्ट्रिक बसेस अशा सर्व प्रकारच्या बसेसच्या परिचलनाची त्यांनी बारकाईने माहिती जाणून घेतली. एनएमएमटी उपक्रमामधील कायमस्वरुपी तसेच रोजंदारीवरील आणि कंत्राटी स्वरुपातील कर्मचारीवर्गाची संवर्गनिहाय माहिती जाणून घेताना कर्मचार्यांच्या अडीअडचणीही जाणून घेतल्या. बस चालकांची वैद्यकीय चाचणी त्यातही दृष्टीचाचणी नियमितपणे केली जावी असे आयुक्तांनी निर्देशित केले. त्याचप्रमाणे वैद्यकीय विमा काढण्याबाबतही जलद कार्यवाही करावी असेही त्यांनी सूचित केले.
वाहतुकीवरील खर्च कमी करण्यासाठी 12 बसेस रात्री मुक्कामी थांबवून किमी धाव वाचविली जात आहे. यामुळे 1181.8 कि.मी. ची दैनंदिन बचत होऊन मासिक 11 लाख रक्कमेची बचत होत असल्याची माहिती घेत असताना आयुक्तांनी यापेक्षा अधिक बस मुक्कामी ठेवण्याबाबत सर्वेक्षण करावे असे सूचित केले. एनएमएमटी परिवहन उपक्रमाचे डबलडेकर बस घेण्याचे नियोजन असून त्या कोणत्या बसमार्गांवर चालविणार याची सविस्तर माहिती घेत आयुक्तांनी या बसेसची वाहतुक व परिचलन योग्य रितीने करता येईल असे मार्ग निवडावेत आणि ते निवडताना जास्तीत जास्त प्रवाशांना लाभ होईल अशा मार्गांची निवड करावी अशा सूचना केल्या. एनसीएमसी कार्ड उपलब्ध करून देणेविषयी पाठपुरावा करण्याच्या सूचना केल्या. महिला स्पेशल तेजस्विनी बसेससाठी महिला ड्राईव्हर यांना प्राधान्य द्यावे व महिला सक्षमीकरणाच्या दृष्टीने नमुंमपा परिवहन उपक्रमाने सकारात्मक पाऊल टाकावे अशाही सूचना आयुक्तांनी यावेळी केल्या.
इलेक्ट्रीकल बसेसमध्ये वाढ करण्याची तसेच फेम 2 योजनेअंतर्गत 20 ठिकाणी उभारण्यात येणार्या चार्जींग स्टेशन कार्यान्वित करण्याच्या कामाला गती द्यावी असेही आयुक्तांनी निर्देशित केले. नवी मुंबईची प्रवासी जीवनवाहिनी ही एनएमएमटी बससेवेची ओळख असून ती अधिक सक्षम आणि प्रवासीकेंद्री होण्याकडे लक्ष पुरवून त्यासाठी जे जे करणे शक्य असेल ती कार्यवाही करावी आयुक्तांनी सूचित केले.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai