Breaking News
पनवेल ः रोडपाली परिसरात रस्त्याच्याकडेला अवजड आणि घातक रसायनांचे टॅकर उभे केले जातात. रहिवाशांनी याबाबत वारंवार पोलीस विभागाकडे तक्रारी केल्या आहेत. मात्र पोलिसांचे कारवाईत सातत्य नसल्याने हा प्रश्न सुटलेला नाही. पनवेल व उरण परिक्षेत्रासाठी नव्याने नियुक्त झालेल्या नवी मुंबईच्या पोलीस उपायुक्तांनी रहिवाशांचा हा सामाजिक प्रश्न सोडविण्यासाठी या टँकरवर कारवाई करुन रस्ते मोकळे केले आहेत.
वसाहतीमध्ये बंदी असतानाही अवजड वाहने उभी केल्याने आतापर्यत आठ टँकरवर फौजदारी गुन्हे दाखल केले आहेत. रोडपाली परिसरात रस्त्याच्याकडेला मोठ्या प्रमाणात अवजड वाहने उभी करून चालक तेथेच संसार थाटतात. त्याच वाहनाशेजारी जेवण शिजवणे, आंघोळी करणे यामुळे या परिसरातील नागरिक त्रासले आहेत. सिडको मंडळाने या परिसरात अवजड वाहने येऊ नयेत यासाठी हाइट गेट उभारले. मात्र तेही फार काळ टिकले नाही. पोलीस उपायुक्त पंकज डहाणे यांनी रहिवाशांच्या तक्रार अर्जांवर कारवाई करण्यास प्राधान्य दिले आहे. उपायुक्तांच्या या कारवाईमुळे अनेक महिन्यांपासून अवजड वाहनांच्या पार्किंगमुळे झाकलेले रस्ते मोकळे होऊन रस्ते रुंद झाल्याचे दिसत आहे. पोलीस उपायुक्त डहाणे यांनी अवजड वाहनांनी लोकवस्तीमध्ये घुसखोरी केल्यास कारवाई करण्याचे आदेश दिल्याप्रमाणे पदपथावर रहदारीस अडचण करून घरगुती गॅस सिलेंडरच्या साह्याने व्यवसाय करणार्यांवर कारवाई करण्याचे आदेश दिले आहेत.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai