Breaking News
नवी मुंबई ः पामबीच मार्गावर सुमारे 11.58 कोटी रुपये खर्चून सायकल ट्रॅक बनविण्यासह परिसराच्या सुशोभिकरणाचे काम महापालिकेच्या माध्यमातून सुरु करण्यात आले आहे. पण यामार्गावर नियमबाह्य पध्दतीने कामे सुरु असून यात तेथील हिरवळीसह लहान-मोठी झाडे देखील तोडण्यात येत असल्याची तक्रार शिवसेना (उध्दव बाळासाहेब ठाकरे)चे शहरप्रमुख विजय माने यांनी महापालिका आयुक्तांकडे पत्राद्वारे केली आहे. तसेच पर्यावरणाचा ऱ्हास करणाऱ्या संबंधित अभियंत्याविरुध्द कारवाई करण्याची मागणी देखील विजय माने यांनी केली आहे.
नवी मुंबई महापालिकेने 11.58 करोडो रुपये खर्च करुन सायकल ट्रॅक निर्मितीचे काम चालू आहे. सायकल ट्रॅकचे काम चालू झाल्यावर तेथे असलेली हिरवळ, लहान-मोठी झाडे तोडण्यात येत आहेत. तसेच काम सुरु असलेल्या ठिकाणी पर्यावरणाचा ऱ्हास होत असून महापालिकेच्या स्थापत्य विभागाने लाखो रुपये खचुन केलेल्या कामांची देखील तोडफोड झालेली आहे. त्यामुळे सदर नियमबाह्य कामाची दखल घेऊन महापालिका प्रशासनाने संबंधित अभियंत्यांवर देखील कारवाई करावी, अशी मागणी विजय माने यांनी केली आहे.
दरम्यान, आलेल्या तक्रारी नंतर आम्ही कामाची पाहणी केली आहे. याठिकाणी कोणत्याही प्रकारे झाडांना इजा न पोहोचविता आणि महत्वाचे म्हणजे झाडांना वाचवून तसेच डायवर्ट करुन काम सुरु केलेले आहे. त्यासाठी कामाचे ड्रॉईंगही बदललेले आहे. यासंदर्भात विभागीय वन अधिकारी आणि जिल्हा वन अधिकारी यांच्या अहवालानुसार बाधित होणाऱ्या झाडांबाबत निर्णय घेण्याकरिता महाराष्ट्र सागरी किनारा क्षेत्र व्यवस्थापन प्राधिकरण आणि सी.आय.ए. या दोन शासकीय संस्थाकडून परवानगी घेतलेली आहे. तरीही तुर्तास आम्ही सदरचे काम थांबविले असून सदर दोन संस्थांकडे झालेल्या बैठकीचे इतिवृत्त महापालिकेला प्राप्त होताच आम्ही मुंबई उच्च न्यायालयाकडून या कामासाठी परवानगी घेऊ असे नेरुळ विभागाचे कार्यकारी अभियंता गिरीश गुमास्ते यांनी सांगितले.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai