उरणचे 100 टक्के कामगार संपात सहभागी

by Aajchi Navi Mumbai
Jan 04, 2023
67

उरण : राज्यातील वीज कर्मचारी संपावर गेल्याने उरणच्या वायू विद्युत केंद्रातील महाजनकोच्या वीज निर्मितीवरही परिणाम झाला आहे. त्यामुळे उरणमधील वायू विद्युत केंद्रातील 50 मेगावॅटचा सयंत्र बंद झाला आहे. परिणामी वायू विद्युत केंद्रातील 210 मेगावॅट वीज निर्मिती 160 वर आली आहे.

उरणच्या वायू विद्युत केंद्रात 267 कामगार कार्यरत आहेत. या संपात 30 कामगार संघटना सहभागी झाल्या आहेत. यामध्ये महाराष्ट्र विद्युत कर्मचारी व अभियंता संघर्ष समिती आहे. वायु विद्युत केंद्रातील शंभर टक्के कामगार,अभियंते संपात सहभागी असून संपामुळे वायू विद्युत केंद्राच्या वीज निर्मितीवर परिणाम झाला आहे. त्यामुळे, 50 मेगावॅट संच बंद झाला आहे. वीज निर्मिती सुरळीत ठेवण्यासाठी टाटा पॉवरचे तंत्रज्ञ बोलविण्यात आले असल्याची माहिती वायू विद्युत केंद्राचे मुख्य अभियंता सुनील इंगळे यांनी दिली. बुधवारी सकाळी 5 वाजल्यापासून उरण शहर, केगाव आदी परिसरातील वीज गेल्याने येथील नागरिकांवर संपाचा परिणाम झाला आहे.

उद्याजक धास्तावले
रात्री एकक वाजेपासून तळोजा औद्योगिक क्षेत्रातील एम आणि व्ही ब्लॉकमध्ये वीज नसल्याने कारखाने डीझेलच्या जनरेटवर सुरू ठेवण्यात आले आहेत. तेथे सर्वाधिक शितगृहे आणि बॉयलर असल्याने या आस्थापना विजेविना सुरू ठेवल्या जाऊ शकत नाही अशी स्थिती आहे. विजेच्या या संकटामुळे तळोजातील उद्योग क्षेत्र धास्तावले आहे. हताश झालेले उद्योजक जनरेटरवर अजून किती वेळ उद्योग सुरू ठेवावे? अशा पेचात अडकले आहे. 12 तासांनंतर जनरेटर सुरू ठेवल्यास जनरेटर गरम होऊन दुर्घटनेच्या शक्यतेने उद्योजक वीज कर्मचाऱ्यांचा संप तातडीने कसा मिटेल, याकडे लक्ष लावून आहेत.