Breaking News
विजय आहिरे
स्मार्ट कार्डचे वितरण ठप्पच : ज्येष्ठांमध्ये नाराजीचा सूर
नवी मुंबई : एस.टी.महामंडळाकडून ज्येष्ठांना ज्या कार्डच्या माध्यमातून प्रवास भाड्यामध्ये सवलत मिळते त्या स्मार्ट कार्डचे वितरण गेले सहा महिन्यांपासून ठप्प आहे. छपाई अभावी कार्डचा तुटवडा जाणवत असल्याने ज्येष्ठांना आधारकार्डचा आधार घ्यावा लागत आहे. जरी महामंडळाने मार्च अखेरपर्यंत आधारकार्ड ग्राह्य धरण्याचा सूचना दिल्या असल्या तरी प्रवाशांमधून मात्र याबाबत नाराजीचा सूर उमटत आहे.
एस.टी महामंडळाकडून विविध घटकातील प्रवाशांसाठी प्रवासी भाड्यात सवलत दिली जाते. स्वातंत्र्य सैनिक, पुरस्कार प्राप्त व्यक्ती, अंध व अपंग विद्यार्थी, ज्येष्ठ नागरिक, रुग्ण, पुरस्कार प्राप्त विजेते खेळाडू, पंढरपूर एकादशीला शासकीय पूजेचा मान मिळवलेले वारकरी दांपत्य तसेच विधानमंडळातील आजी-माजी सदस्य इत्यादी घटकांना प्रवास भाड्यात सवलत दिली जाते. याकरिता महामंडळाकडून स्मार्ट कार्ड योजना राबवली जाते. हे स्मार्ट कार्ड मिळवण्यासाठी संबंधितांना नजीकच्या महामंडळ विभाग कार्यालयात जाऊन आवश्यक कागदपत्रे दाखल केल्यास स्मार्ट कार्ड बनवून मिळते. 1 जून 2019 पासून ही स्मार्ट कार्ड योजना सुरू करण्यात आली आहे. 65 वर्षावरील ज्येष्ठांना प्रवासी भाड्यात 50 टक्के तर 75 वर्षावरील ज्येष्ठांना 100 टक्के सूट दिली जाते. महाराष्ट्रात एसटीमधून सुमारे दररोज 30 ते 35 लाख प्रवासी प्रवास करतात. स्मार्ट कार्ड बनविणाऱ्या कंत्राटदाराची मुदत संपल्याने राज्यातील स्मार्ट कार्डची कामे ठप्प झाली असून याबाबत महामंडळ व संबंधित कंत्राटदार कंपनीची बोलणी सुरू असल्याचे समजते. कंपनीने मोबदला वाढवून देण्याची मागणी केली असून यावर अद्याप तोडगा न निघाल्याने स्मार्ट कार्डची कामे ठप्प झाली असल्याची माहिती समोर आली आहे.
पनवेल आगारमधून मात्र स्मार्ट कार्ड तयार करण्यासाठी तांत्रिक अडचण येत असल्याचे सांगण्यात येत आहे. परिणामी नागरिकांना स्मार्ट कार्डचे वितरण झाले नाही. दरम्यान एसटी महामंडळाने या ज्येष्ठांच्या प्रवासात स्मार्ट कार्डची अडचण ठरू नये याकरिता मार्च 2023 अखेरपर्यंत आधार कार्ड ग्राह्य धरण्याची मुभा दिली आहे.
पनवेल आगार :
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai