Breaking News
मुंबई ः प्रकाश आंबेडकरांच्या वंचित बहुजन आघाडीशी शिवसेनेने मुंबई महापालिका निवडणुकीच्या पार्श्वभुमीवर युती केली आहे. ही युती झाल्यानंतर प्रकाश आंबेडकर यांनी महाविकास आघाडीचे जनक शरद पवार यांच्यावर आरोपांची तोफ डागली आहे. त्यानंतर राष्ट्रवादी काँग्रेसने उद्धव ठाकरे यांना अल्टीमेटम दिल्याने आघाडी दुभंगण्याची शक्यता वर्तवली जात आहे.
मुंबई महापालिकेची निवडणुक डोळ्यासमोर ठेवून शिवसेनेने वंचित बहुजन आघाडीशी युती केली आहे. युती जाहीर होताच वंचित बहुजन आघाडीचे अध्यक्ष प्रकाश आंबेडकर यांनी थेट शरद पवारांवरच हल्लाबोल केला आहे. त्यांनी राष्ट्रवादीचे अध्यक्ष शरद पवार हे काल, आज आणि उद्या भाजपचेच असल्याचे वक्तव्य करुन खळबळ उडवून दिली आहे.
2019 च्या राज्याच्या निवडणुकीत प्रकाश आंबेडकर यांच्या वंचित आघाडीशी युती करण्याचा प्रयत्न राष्ट्रवादी काँग्रेस व काँग्रेस पक्षाने केला होता. सुरुवातीला आंबेडकरांनी मोजक्या जागा मागितल्या होत्या परंतु ही मागणी मान्य होण्याची शक्यता दिसताच त्यांनी जागांचा आकडा वाढवल्याचे बोलले जाते. त्याचबरोबर त्यांनी मराठवाड्यातील व सोलापुरातील महत्वाच्या जागांवर दावा ठोकल्याने वंचित बहुजन पक्षाशी काँग्रेस राष्ट्रवादीची आघाडी होवू शकली नाही. त्यानंतर प्रकाश आंबेडकरांनी एमआयएमच्या असदुद्दिन ओवैसी यांच्या पक्षाशी आघाडी करुन मराठवाडा व सोलापुर जिल्ह्यात निवडणुक लढवल्याने काँग्रेस राष्ट्रवादीला मोठा फटका बसला.
हा इतिहास ताजा असताना उद्धव ठाकरे यांनी प्रकाश आंबेडकरांशी केलेली युती ही म्हणजे आगीशी खेळण्याचा प्रकार असल्याचे राजकीय तज्ज्ञांचे मत आहे. युती होताच प्रकाश आंबेडकरांनी केलेली वक्तव्ये ही महाविकास आघाडीला सुरुंग लावणारी असल्याने त्याची मोठी किंमत शिवसेनेला मोजावी लागेल असे बोलले जात आहे. आधीच बंडखोरीतून सावरत असलेल्या शिवसेनेला महाविकास आघाडी दुभंगल्यास आगीतून फुफाट्यात पडल्यासारखे होईल. प्रकाश आंबेडकरांच्या वक्तव्यानंतर राष्ट्रवादी काँग्रेस पक्षाचे अध्यक्ष जयंत पाटील यांनी शिवसेनेला अल्टीमेटम दिला आहे, तर शिवसेनेचे नेते संजय राऊत यांनी महाविकास आघाडीला तडा जाईल असे वक्तव्य आघाडीतील नेत्यांनी न करण्याचे आवाहन केले आहे. परंतु, या आवाहनाला प्रकाश आंबेडकर कसा प्रतिसाद देतात यावर महाविकास आघाडीचे भवितव्य अवलंबून आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai