Breaking News
पनवेल : रिक्षातून घरी सोडण्याच्या बहाण्याने खोपोलीतील एका बारमध्ये काम करणाऱ्या तरुणीवर दोघांनी अत्याचार केल्याची घटना उघडकीस आली आहे. अविनाश साहेबराव चव्हाण (वय 22) व वाकड्या अशी संशयित आरोपींची नावे असून पनवेल शहर पोलिसांनी त्यांच्याविरोधात सामूहिक बलात्काराचा गुन्हा दाखल केला. अविनाशला अटक करण्यात आली असून त्याच्या साथीदाराचा शोध सुरू आहे. न्यायालयाने अविनाशची 4 फेब्रुवारीपर्यंत पोलिस कोठडीत रवानगी केली.
पीडित 20 वर्षीय तरुणी पनवेलच्या करंजाडे भागात राहण्यास असून ती खोपोली येथील एका बारमध्ये डान्सर म्हणून काम करते. शनिवारी (ता. 28) मध्यरात्री 1 वाजण्याच्या सुमारास तरुणी बारमधून सुटल्यानंतर ती पनवेल येथे मित्रासोबत आली होती. त्यानंतर एका हॉटेलमध्ये जेवण केल्यानंतर तिचा मित्र त्या ठिकाणावरून निघून गेला. करंजाडे येथील घरी जाण्यासाठी ती रिक्षाची वाट पाहत उभी होती. त्यावेळी मद्यधुंद असलेल्या अविनाश आणि वाकड्या यांनी तिला रिक्षातून करंजाडे येथे सोडण्याचा बहाणा करत ओरियन मॉलच्या पाठीमागील भागात नेले. त्यानंतर दोघांनी दमदाटी करून पडक्या इमारतीच्या टेरेसवर नेत अत्याचार केल्यावर पलायन केले. यानंतर पीडित तरुणीने पनवेल शहर पोलिस ठाणे गाठत तक्रार दाखल केली. पोलिसांनी गुन्हा दाखल करत तरुणीने केलेल्या वर्णनावरून पंचशील नगर झोपडपट्टीत राहत असलेल्या अविनाश चव्हाण याला रविवारी (ता. 29) सायंकाळी अटक केली.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai