सहकारी संस्थेच्या कामाला येणार गती

सहकारी संस्थेच्या कामाला येणार गती

by Aajchi Navi Mumbai
Feb 03, 2023
215

नवी मुंबई ः नवी मुंबईत अनेक महत्वाकांक्षी प्रकल्प येऊ घातले आहेत. या सर्व प्रकल्पांच्या अमंलबजावणीची व सनियंत्रणाची नवीन जबाबदारी सिडकोवर आहे. तसेच नव्याने विकसीत होत असलेल्या नोडमध्ये मोठ्या प्रमाणावर गृहनिर्माण संस्था निर्माण होत आहेत. सिडकोच्या सहकार विभागातील मनुष्यबळाच्या अभावामुळे अनेक गृहनिर्माण प्रकल्प नोंदणी व इतर संबंधित कामे प्रलंबित आहेत. त्यामुळे नगरविकास विभागाने सिडकोतील सहकारी संस्था विभागासाठी वाढीव अधिकारी दिले आहेत. 7 नवीन पदे निर्माण करण्यात आली आहेत.

सिडकोच्या कार्यक्षेत्रातील अंदाजे साडेआठ ते नऊ हजारांहून अधिक हौसिंग सोसायट्या अर्थात सहकारी गृहनिर्माण सोसायट्या आहेत. सिडकोच्या कार्यक्षेत्रातील नवी मुंबई महापालिका, पनवेल महापालिकेसह उलवे, द्रोणागिरी, तळोजासह नैना क्षेत्रात मोठ्या प्रमाणात गृहनिर्माण प्रकल्पांची कामे सुरू आहेत. स्वत: सिडकोही पंतप्रधान आवास योजनेंतर्गत 95 हजार घरांचे बांधकाम करत आहे. यामुळे सिडकोच्या कार्यक्षेत्रातील सहकारी गृहनिर्माण संस्थांची संख्या भविष्यात आणखी वाढणार आहे. तसेच सिडकोवर नवी मुंबईतील विमानतळ, नवी मुंबई मेट्रो, नैना प्रकल्प यासारख्या मोठ्या प्रकल्पांची जबाबदारी आहे. त्यात सहनिंबधक, सहकारी संस्था, सिडको या कार्यालयात अपुरा कर्मचारी वर्ग असल्याने कामकाजाचा निपटारा करणे अत्यंत कठिण होत आहे. सिडको कार्यक्षेत्रातील गृहनिर्माण संस्थांची संख्या लक्षात घेता सिडकोच्या सहनिबंधक कार्यालयातील विद्यमान कर्मचाऱ्यांवर ताण येत होता. परिणामी शहरातील गृहनिर्माण संस्थांची कामे उशिराने होत आहेत. याची दखल घेत संबंधित संबंधित कामकाज करण्यासाठी सहकार विभागाच्या आस्थापनेवर नविन पदे निर्माण करण्यास 13 डिसेंबर 2022 रोजी झालेल्या बैठकीत मान्यता दिली होती. त्याअनुषंगाने 7 नियमीत पदे निर्मितीस शासनाने मान्यता दिली आहे. नगरविकास विभागाने 1 फेब्रुवारी रोजी खास सिडकोच्या सहकारी संस्था विभागासाठी सात वरिष्ठ अधिकाऱ्यांची एक टीम दिली आहे. यामुळे गृहनिर्माण संस्थांची स्थापनेपासून ते डिम्ड कन्व्हेन्स अर्थात मानीव हस्तांतरणापर्यंतची विविध कामे करता येणे सोपे होणार आहे.

पुनर्विकासाला मिळणार वेग
सध्या नवी मुंबईत पुनर्विकासाचे वारे वाहत आहेत. वाशी, नेरूळ, कोपरखैरणे, पनवेल विभागात काही ठिकाणी सिडकोने बांधलेल्या जुन्या वसाहतींचा पुनर्विकासाची कामे सुरू झालेली आहेत. तो करताना सोसायटीतील सभासदांची संमतीपासून अनेक कामे सिडकोतील सहकारी संस्था विभागाशी निगडीत आहेत. आता वाढीव सात अधिकारी मिळाल्याने पुनर्विकास करू इच्छिणाऱ्या गृहनिर्माण संस्था आणि विकासकांना दिलासा मिळणार आहे.

मंजुरी नवीन पदनिर्मितीस
1 सहनिबंधक सहकारी संस्था, 1 उपनिबंधक सहकारी संस्था, 1 सहायक निबंधक सहकारी संस्था, 2 सहकार अधिकारी श्रेणी-1 आणि 2 सहकार अधिकारी श्रेणी-2 असे सात वाढीव अधिकारी आता सिडकोच्या सहकार संस्था कार्यालयाला मिळणार आहे.