Breaking News
नवी मुंबई ः औद्योगिक विकास महामंडळाने नवी मुंबई मनपाला हस्तांतरित केलेला भूखंड तिसऱ्यालाच विकल्याचा धक्कादायक प्रकार समोर आला आहे. सदर भूखंडावर मनपाने विकसित केलेले उद्यान नव्या मालकाने उध्वस्त करून स्वतःचे बांधकाम सुरु करताना शिवसेनेच्या पदाधिकाऱ्यांनी अटकाव केला. या बाबत नवी मुंबई मनपाला माहिती मिळताच त्यांनीही घटनास्थळी धाव घेत काम बंद केले.
26 जुलै 2001 रोजी औद्योगिक विकास महामंडळाने नवी मुंबई महानगरपालिकेला वृक्ष लावण्यासाठी त्याचप्रमाणे उद्यानासाठी औद्योगिक वसाहतीतील काही भूखंड हस्तांतरित केले होते. त्यापैकी इंदिरा नगर तुर्भे येथे शांताबाई सुतार हे उद्यान विकसित केले होते. सोमवारी या ठिकाणी उद्यान उद्धवस्त करण्यासाठी जेसीबी लाऊन काम सुरु होते. या बाबत माहिती मिळताच शिवसेना (उद्धव बाळासाहेब ठाकरे) पदाधिकाऱ्यांनी तातडीने घटनास्थळी धाव घेतली वस्तुस्थिती पाहिली आणि तसेच या ठिकाणी विचारणा केली असता सदर भूखंड विकण्यात आला असून त्याचा ताबा घेत आमचे काम सुरु असल्याची धक्कादायक माहिती समोर आली. त्यामुळे ही बाब मनपाच्या निदर्शनास आणण्यात आली. घटनेचे गांभीर्य ओळखत तुर्भे विभागाचे सहाय्यक आयुक्त सुखदेव येडवे आणि मालमत्ता विभागाच्या अधिकाऱ्यांनी जागेवर जाऊन पाहणी केली. त्यांनी सदर काम बंद केले. शिवसेनेच्या पदाधिकाऱ्यांनी महानगरपालिकेचे अतिरिक्त आयुक्त संजय काकडे यांची भेट घेऊन त्यांना या संदर्भात विस्तृत निवेदन दिले. यावेळी शिवसेना उपजिल्हाप्रमुख प्रकाश पाटील यांच्यासोबत उपशहरप्रमुख महेश कोटीवाले, विनोद मुके, माजी परिवहन सदस्य, विभागप्रमुख समीर बागवान, बाळकृष्ण खोपडे, प्रेमराज जाधव, उपविभाग प्रमुख किशोर लोढे, शाखाप्रमुख अशोक भामरे,महेश हलवाई, जहागीर शेख हे पदाधिकारी उपस्थित होते.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai