Breaking News
घरांच्या किंमती कमी न केल्यास व्यवस्थापकीय संचालकांच्या दालनात मनसे स्टाईल आंदोलन
नवी मुंबई ः उलवे आणि बामनडोंगरी येथील सिडको घरांच्या अवाजवी किमतींविरोधात बुधवारी मनसे तर्फे प्रवक्ते व शहर अध्यक्ष गजानन काळे यांच्या नेतृत्वाखाली “भीक मागा” आंदोलन करण्यात आले. सीवूड्स येथील ग्रँड सेंट्रल मॉल पासून ते सीवूड्स डीमार्ट पर्यंत पायी मोर्चा काढत लोकांकडून व दुकानदारांकडून रुपया मागत मनसेने सिडकोचा निषेध केला. यावेळी शेकडोंच्या संख्येने सोडतधारक आपल्या परिवारासह, लहानग्यांसह मोर्चात सहभागी झाले होते. या आंदोलनानंतर देखील सिडकोने मागण्या मान्य केल्या नाहीत तर सिडको व्यवस्थापकीय संचालकांच्या दालनात जाऊन मनसे स्टाईल आंदोलन करू असा इशारा यावेळ देण्यात आला.
सिडकोच्या विरोधात आपला रोष व्यक्त करत मोर्चेकरांनी सिडकोचे अधिकारी झाले मस्तवाल... सिडकोला भीक द्याल, सिडको बिल्डरचे लागेबांधे... गोरगरिबांच्या फक्त आणा भाका.. सिडकोसाठी भीक टाका, 25 हजार पगारात 35 लाखाचे घर...सोडतधारकांना न्याय द्या, सिडकोच्या घरांचे दर कमी करा... कमी करा कमी करा.. या व अशा अनेक घोषणांनी परिसर दणाणून सोडला. या आंदोलनात सर्वसामान्यांनी देखील सक्रिय सहभाग नोंदवत रुपया टाकून सिडको विरोधात आपला निषेध नोंदवला. या आंदोलनानंतर देखील सिडकोने मागण्या मान्य केल्या नाहीत तर सिडको व्यवस्थापकीय संचालकांच्या दालनात जाऊन मनसे स्टाईल आंदोलन करू असा थेट इशारा मनसे प्रवक्ते व शहर अध्यक्ष गजानन काळे यांनी याप्रसंगी दिला.
सिडकोने दिवाळी 2022 मध्ये उलवे, बामणडोंगरी या ठिकाणांसाठी 7,849 घरांची अत्यल्प उत्पन्न गटातील लोकांसाठी महागृहनिर्माण योजने अंतर्गत सोडत काढली होती. ही सोडत काढताना सोडतधारकांसाठी उत्पन्न मर्यादा मासिक कमाल रु.25,000 पर्यंत आणि वार्षिक 3 लाख रुपये पर्यंत सिडकोने ठेवली होती. परंतु ही योजना व सोडत पंतप्रधान आवास योजने अंतर्गत व अत्यल्प उत्पन्न गटातील लोकांसाठी असताना देखील सिडकोने या घरांच्या किंमती 35 लाखांच्या घरात ठेवल्या आहेत. तसेच हि योजना आणताना सिडकोने 322 चौ.फूट. क्षेत्रफळ मिळेल असे माहिती पुस्तिकेत सांगितले असताना देखील प्रत्यक्षात मात्र योजनेतील घरे हि 290 चौ फूट क्षेत्रफळाची असल्याचा आरोप सोडतधारकांनी केला आहे. या बाबत मनसे शिष्टमंडळाने सोडतधारकांसोबत सिडकोचे सह-व्यवस्थापकीय संचालक राजेश पाटील यांची भेट घेऊन वरील प्रश्नांबाबत चर्चा केली होती. मात्र यानंतर ही सिडकोकडून कोणताही प्रतिसाद न आल्यामुळे मनसेतर्फे सिडको व राज्य सरकार विरोधात “भीक मागा“ आंदोलन करण्यात आल्याचे मनसे प्रवक्ते व नवी मुंबई शहर अध्यक्ष गजानन काळे यांनी प्रसिद्धीपत्रकात म्हटले आहे.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai