Breaking News
नवी मुंबईतील बस स्थानकांचा होणार विकास
नवी मुंबई ः शासनाने राज्य परिवहन महामंडळाच्या भुखंडांवर वाणिज्य वापरास मंजुरी दिली त्याच धर्तीवर नवी मुंबई महापालिकेला 2013 साली मंजुरी देण्यात आली होती. परंतु, नवीन विकास नियंत्रण नियमावली बसडेपोच्या जागेवर वाणिज्य वापराची तरतूद नसल्याने महापालिकेने सदर प्रस्ताव पुर्नमंजुरीसाठी शासनास सादर केला होता. या प्रस्तावास शासनाची मंजुरी मिळाल्याचे मंत्रालयातील सुत्रांकडून कळत आहे.
तोट्यात चालणाऱ्या एसटी महामंडळाला उत्पन्नाचे नवीन स्त्रोत मिळावेत म्हणून महाराष्ट्र सरकारने एसटी महामंडळाच्या ताब्यातील बसडेपोंचे रुपांतरण वाणिज्य वापरात करण्याचे धोरण जाहीर केले होते. याच धर्तीवर महापालिकेच्या अखत्यारितील एनएमएमटीने 2009 साली त्यांच्या ताब्यातील नेरुळ, बेलापुर, वाशी, आसूडगाव या बस डेपोंचे रुपांतरण वाणिज्य संकुलात करण्यासाठी एसटी महामंडळाला दिलेल्या परवानगीच्या आधारे शासनाकडे मागणी केली होती. त्याअनुषंगाने 2011 साली तत्कालीन सहाय्यक संचालक नगरररचना संजय बाणाईत यांनी नागरिकांच्या सुचना व हरकती घेऊन सदर प्रस्ताव शासनाला मंजुरीसाठी पाठवला होता. या प्रस्तावास शासनाने 2013 साली मंजुरी दिली.
या मंजुरीच्या अनुषंगाने पालिकेच्या परिवहन उपक्रमाने 150 कोटी रुपये खर्च करुन वाशी बसडेपोमध्ये वाणिज्य संकुल उभारण्याचे काम हाती घेतले आहे. त्यामधुन परिवहन उपक्रमाला वार्षिक 25 कोटी रुपयांचे उत्पन्न येणे अपेक्षित आहे. याच धर्तीवर परिवहन उपक्रमाने बेलापुर, कोपरखैरणे व घणसोली येथील बस डेपो विकसीत करण्याचे नियोजन केले होते. परंतु, शासनाने 2020 मध्ये मंजुर केलेल्या एकत्रिकृत विकास नियंत्रण व प्रोत्साहन नियमावलीमधून हे नियम वगळण्यात आल्याने परिवहन उपक्रमाला या डेपोंचा विकास हाती घेता आला नाही. त्यामुळे नवी मुंबई पालिकेने परिवहन उपक्रमाच्या ताब्यातील भूखंडांवर देखील वाणिज्य वापरास परवानगी मिळावी अशी विनंती नगर विकास विभागास 13 ऑक्टोबर 2022 रोजी केली होती. पालिकेच्या या मागणीला नगरविकास विभागाने मंजुरी दिली असून परिवहन उपक्रमाच्या ताब्यात असलेल्या भुखंडांचा आता वाणिज्यिक वापरासह विकास करण्याचा मार्ग मोकळा झाला आहे.
या शासन निर्णयामुळे परिवहन उपक्रमाद्वारे नागरिकांना उत्तम सेवा सुविधा पुरविणे शक्य होणार असल्याचे महापालिका आयुक्त राजेश नार्वेकर यांनी सांगितले. त्याचबरोबर या वाणिज्य संकुलात नागरिकांसाठी अतिरिक्त पार्किंग व्यवस्था करण्याचा प्रयत्न केला जाईल असे आजची नवी मुंबईशी बोलताना सांगितले.
रिपोर्टर
The Reporter specializes in covering a news beat, produces daily news for Aajchi Navi Mumbai News
Aajchi Navi Mumbai